Bloomberg-ը տեղեկացել է Ուկրաինային ռազմական օգնության հիմնադրամ ստեղծելու Հունգարիայի համաձայնության մասին

Հունգարիան հրաժարվել է Ուկրաինային 5 մլրդ եվրոյի (5,4 մլրդ դոլար) ռազմական օգնության հիմնադրամի ստեղծման դեմ իր առարկություններից, որն ապահովելու է Կիևին զենքի կայուն մատակարարումը։ Այս մասին Bloomberg-ին հայտնել են աղբյուրները, որոնք տեղյակ են հունվարի 24-ին ԵՄ երկրների դեսպանների հանդիպման արդյունքների մասին: 

Ընդ որում, Ուկրաինային 50 մլրդ եվրոյի ֆինանսական օգնություն հատկացնելու հարցը, որն ավելի վաղ արգելափակվել էր Բուդապեշտի կողմից, «մնում է չլուծված», նշել են նրանք։

Օրեր առաջ Հունգարիան դեմ էր հանդես եկել Եվրոպական արտաքին կապերի ծառայության առաջարկած ռազմական հիմնադրամ ստեղծելու գաղափարին: Հիմնադրամը թույլ կտա փոխել մեխանիզմը, որը կփոխհատուցի ԵՄ երկրներին Ուկրաինա ուղարկվող սպառազինության ծախսերը։ Ենթադրվում է, որ դրանից 2024-2027 թվականներին ԵՄ երկրներին կվճարվի 5 մլրդ եվրոյի չափով տարեկան փոխհատուցում։ Ընդամենը չորս տարվա ընթացքում նրանք Ուկրաինային զենք մատակարարելու համար կստանան 20 մլրդ եվրո։