Bayraktar ընկերությունը Կիևի մոտ սկսել է անօդաչու թռչող սարքերի գործարանի կառուցումը. Reuters

Կիևի մերձակայքում սկսվել է թուրքական «Բայրաքթար» անօդաչու թռչող սարքերի արտադրության գործարանի շինարարությունը։ Նրա տարեկան հզորությունը կկազմի մոտ 120 միավոր։ Կրեմլը նշել է, որ դա «ընկնում է ապառազմականացման թեմայի տակ»։

Թուրքական Baykar-ը Կիևի մերձակայքում սկսել է գործարանի կառուցումը, որը կարտադրի Bayraktar անօդաչու սարքեր։ Այս մասին Սաուդյան Արաբիայում սպառազինությունների ցուցահանդեսի ժամանակ Reuters-ին տված հարցազրույցում ասել է ընկերության գլխավոր տնօրեն Հալուք Բայրաքթարը։

«Շինարարությունն ավարտելու համար մեզ անհրաժեշտ է մոտ 12 ամիս, որից հետո մենք կանցնենք ներքին գործընթացներին, սարքավորումներին և կազմակերպչական կառուցվածքին»,- մեջբերում է գործակալությունը նրա խոսքերը։ «Ուկրաինայում գործարանը մեծ է, մենք նախատեսում ենք աշխատանքի ընդունել մոտավորապես 500 մարդու»։

Ըստ Bayraktar-ի՝ ձեռնարկության տարեկան արտադրական հզորությունը կկազմի մոտ 120 Bayraktar անօդաչու թռչող սարք։ Նա նաև նշել է, որ դեռ պարզ չէ՝ դրանք կլինեն TB2, թե TB3 մոդելներ։

Reuters-ի հարցին գործարանում անվտանգության հնարավոր մտահոգությունների մասին, Baykar-ի գործադիր տնօրենն ասել է, որ «պլաններն ամբողջությամբ իրականացվում են, և ոչինչ չի կարող խանգարել դրան»:

Գործակալությունը, վկայակոչելով SIPRI վերլուծական կենտրոնի տվյալները, նշում է, որ ընկերությունը Bayraktar TB2-ի մատակարարման արտահանման պայմանագրեր է ստորագրել 30 երկրների հետ, այդ թվում՝ Ուկրաինայի, Եթովպիայի, Լիբիայի և Ադրբեջանի հետ։

Նշենք, որ 2023 թվականի սեպտեմբերին Բայրաքթարը հայտարարել է մոտ 100 միլիոն դոլար ներդնելու պլանների մասին Ուկրաինայում երեք նախագծերում՝ գործարան կառուցելու և սպասարկման կենտրոնի և այս երկրում ընկերության գլխավոր գրասենյակի պահպանման մասին: Նա նաև խոստացել է ձեռնարկությունը գործարկել 2025 թվականին։

ՌԴ նախագահի մամուլի քարտուղար Դմիտրի Պեսկովը հայտարարել է, որ Բայրաքթարի արտադրության գործարանի կառուցումը «ընկնում է ապառազմականացման թեմայի տակ» և «միայն կերկարացնի ուկրաինացիների տառապանքը»։ Միաժամանակ, նրա խոսքով, նման ձեռնարկության ի հայտ գալը Մոսկվային չի խանգարի հասնել ռազմական գործողության նպատակներին։