Forbes-ը հրապարակել է 2024թ.-ի Fintech 50 ցուցակը

Forbes-ի իններորդ ամենամյա Fintech 50 ցուցակում հայտնվել են ընկերություններ, որոնք շարունակում են նորարարություններ կատարել, ընդլայնվել և հարմարվել՝ չնայած արդյունաբերության առջև ծառացած մարտահրավերներին, ինչպիսիք են աշխատատեղերի կրճատումները, նվազեցված գնահատումները և վենչուրային կապիտալի անկումը: Ըստ CB Insights-ի՝ ֆինտեխ ստարտափների համաշխարհային ֆինանսավորումը 2021թ․ 141 մլրդ դոլարից իջել է մինչև 75 մլրդ դոլար 2022թ․ և հետագայում՝ մինչև 39 մլրդ դոլար 2023թ․:

Այդուհանդերձ, այս տարվա ցուցակում ընդգրկվելու համար լուրջ մրցակցություն է եղել։ Forbes-ի թիմը մանրակրկիտ գնահատել է բազմաթիվ ֆինտեխ ձեռնարկություններ՝ հաշվի առնելով տարբեր գործոններ՝ սկսած նրանց արտադրանքի յուրահատկությունից մինչև հաճախորդների բազայի և եկամուտների աճը, ինչպես նաև նրանց ղեկավար թիմերի բազմազանությունը: Հարցազրույցներ են անցկացվել գործադիր տնօրենների և ոլորտի ինսայդերների հետ՝ որպես Forbes-ի գնահատման գործընթացի մաս: Պետք է հաշվի առնել, որ ցուցակագրված ստարտափները կամ պետք է ունենային գլխամասային գրասենյակ ԱՄՆ-ում, կամ զգալի գործունեություն ծավալեին այնտեղ, ինչպես նաև չէին կարող հանդիսանալ հանրային առևտրով զբաղվող ընկերություն:

Forbes-ի ցանկի մեծ մասը՝ 50-ից 27-ը և 13 նոր խաղացողներից 7-ը, ընդգրկված են 3 կատեգորիաներում, որոնք հիմնականում նախատեսված են այլ բիզնեսների համար՝ Payments, Wall Street & Enterprise և Business to Business Banking: Այս միտումը զարմանալի չէ՝ հաշվի առնելով ներկայիս միջավայրը, որտեղ վենչուրային կապիտալի ֆինանսավորման սղություն կա լայնածավալ սպառողական մարքեթինգային արշավների համար: Անշարժ գույքի կատեգորիայում, որի վրա ազդում են տատանվող տոկոսադրույքները, ընդգրկվել են միայն 2 ընկերություններ: Բացի այդ, Blockchain և Crypto կատեգորիան, որը ողջ նախորդ տարին ուղեկցվել է զգալի սկանդալներով և սնանկացումներով, ներկայացրել է միայն 3 ստարտափ, որոնք բոլորն էլ կենտրոնացած են ապագայի համար ավելի կայուն և անվտանգ ենթակառուցվածք ստեղծելու վրա: