Ադրբեջանցի հետախուզվողի մասով ՌԴ-ից հարցում ստացել ու նույն օրը պատասխանել ենք. ՆԳ նախարար

ՀՀ ներքին գործերի նախարար Վահե Ղազարյանը լրագրողների հետ ճեպազրույցի ժամանակ անդրադարձել է Հայաստանի կողմից մի շարք ծանր հանցագործությունների մեջ մեղադրվող և հետախուզման մեջ գտնվող Քամիլ Զեյնալիին Բաքու վերադարձնելու մասին լուրին։

«Կա ընթացակարգ, եթե հետախուզվողին բռնում են, իրենք մեզ հարցում են ուղարկում, մենք էլ հարցմանը պատասխանում ենք։ Դա բոլոր միջազգային հետախուզվողներին է վերաբերվում։ Մենք մեր գործառույթները լրիվությամբ իրավաչափ իրականացրել ենք։ Հարցում են ուղարկել, հարցմանը պատասխանել ենք։ Մենք մեր ընթացակարգից չենք շեղվել»,-ասաց Ղազարյանը։

Հարցին՝ թե արդյոք քաղաքական որոշում է կայացրել Ռուսաստանը, Ղազարյանը պատասխանեց՝ չեմ կարող ասել դա քաղաքական որոշում է, թե՝ ոչ: «Մենք նմանատիպ հետախուզվողներ էլի ունենք, որ բռնել են ու բաց թողել։ Այդ հարցին կարող է ռուսական կողմը պատասխանել»,-ՆԳ նախարարը։