X սոցիալական ցանցը կարող է թաքցնել հավանումների և ռեփոստերի քանակը. Reuters

X սոցիալական ցանցը (նախկինում՝ Twitter) շուտով կարող է թաքցնել հավանումների և վերահրապարակումների քանակը, որոնք ցուցադրվում են յուրաքանչյուր հրապարակման տակ։ Այս մասին ասել է սոցցանցի սեփականատեր Իլոն Մասկը՝ ելույթ ունենալով Morgan Stanley-ի տեխնոլոգիայի, լրատվամիջոցների և հեռահաղորդակցության հարցերով համաժողովում, փոխանցում է Reuters-ը։

Միլիարդատերը բացատրել է, որ ընկերությունը մտածում է թաքցնել այս տեղեկատվությունը, քանի որ այն տեսողականորեն խառնում է հարթակի բովանդակությունը: Նա չի հայտնել, թե երբ կարող են փոփոխություններն ուժի մեջ մտնել։

Մասկը նաև ասել է, որ X-ը շուտով կարող է դրամական փոխանցումների արտոնագրեր ստանալ Նյու Յորքում և Կալիֆորնիայում։ Գործարարի խոսքով՝ սոցիալական ցանցը կարող է լիցենզիա ստանալ Կալիֆորնիայում հաջորդ ամսվա ընթացքում, իսկ Նյու Յորքում թույլտվություն ստանալը կարող է տևել «մի քանի ամիս»։

2022 թվականի ապրիլին Twitter-ը գնելուց հետո Մասկը որոշել է սոցիալական ցանցը վերածել չինական շուկայում գերիշխող Tencent-ի WeChat հավելվածի նման գերհավելվածի, նշում է Reuters-ը։ Անցյալ օգոստոսին միլիարդատերը հայտարարել է, որ X-ը կներկայացնի տեսազանգեր և աուդիո զանգեր, որոնք կաշխատեն Android և iOS սմարթֆոնների վրա, ինչպես նաև համակարգիչների և Mac-ների վրա՝ առանց հեռախոսահամարի հետ կապվելու:

Որպեսզի ԱՄՆ X օգտատերերը միմյանց գումար փոխանցեն, հարթակը պետք է համապատասխան թույլտվություններ ստանա բոլոր նահանգներում: Ընկերությունը նախկինում արտոնագրեր էր ստացել Փենսիլվանիայում և Յուտայում: Մասկը նշել է, որ ամենակարևորը կլինի թույլտվություն ստանալ Նյու Յորքում և Կալիֆորնիայում, որտեղ լիցենզիայի տրամադրման գործընթացը երկար է տևում, գրում է Reuters-ը։