Հուսով ենք, որ Ադրբեջանն ու Հայաստանը շուտով խաղաղության համաձայնագիր կստորագրեն. Վրաստանի ԱԳՆ

Եռակողմ հանդիպման ընթացքում քննարկվել են տարբեր ոլորտներին վերաբերող հարցեր։ Երկկողմ մակարդակում կան նաև ռազմավարական գործընկերություններ և օրինակելի հարաբերություններ Վրաստանի, Ադրբեջանի և Թուրքիայի հետ։

Ինչպես հաղորդում է ԱՊԱ-ն, այս մասին Վրաստանի արտգործնախարար Իլյա Դարչիաշվիլին հայտարարել է այսօր Բաքվում կայացած Ադրբեջանի, Վրաստանի եւ Թուրքիայի արտգործնախարարների եռակողմ հանդիպման արդյունքներով ճեպազրույցի ժամանակ։

«Երկու երկրներն էլ Վրաստանի խոշորագույն առևտրային գործընկերներն են։ Քննարկվել է համագործակցությունը քաղաքական, տնտեսական, առևտրային, պաշտպանական, մշակութային, տրանսպորտի և էներգետիկայի ոլորտներում։ Իհարկե, մենք հատուկ ուշադրություն ենք դարձրել տարածաշրջանում տեղի ունեցող գործընթացներին և մեր համատեղ ջանքերին՝ հաղթահարել այս մարտահրավերները»,- ասել է նախարարը։

Իլյա Դարչիաշվիլին ընդգծել է, որ Վրաստանը վճռականորեն աջակցում է Հարավային Կովկասում խաղաղ գոյակցությանը և պատրաստ է նպաստել տարածաշրջանում խաղաղության և կառուցողական համագործակցության խթանման գործընթացին։

«Մենք հուսով ենք, որ Ադրբեջանն ու Հայաստանը շուտով համաձայնության կգան և կստորագրեն խաղաղության համաձայնագիր, որը շրջադարձային կդառնա տարածաշրջանում կայուն խաղաղության և կայունության համար»,- ասել է Վրաստանի ԱԳՆ ղեկավարը։