Հարավային Կորեան և ԱՄՆ-ն Հյուսիսային Կորեայի հետ նավթի առևտրի համար պատժամիջոցներ կկիրառեն

Կորեայի Հանրապետությունը և Միացյալ Նահանգները պատրաստ են քննարկել ԿԺԴՀ նավթի մաքսանենգության մեջ ներգրավված իրավաբանական և ֆիզիկական անձանց դեմ անկախ պատժամիջոցներ սահմանելու հարցը։ Այս մասին հայտնում է Կորեայի Հանրապետության արտաքին գործերի նախարարությունը։

Մարտի 26-ին Վաշինգտոնում կայացել է ԿԺԴՀ-ի հրթիռային և միջուկային ծրագրերի անօրինական ֆինանսավորման դեմ պայքարի երկկողմ աշխատանքային խմբի առաջին հանդիպումը։ Դրան մասնակցել են դիվանագիտության, հետախուզության ոլորտի ավելի քան 30 պաշտոնյաներ, պատժամիջոցներից խուսափելու դեմ պայքարի մասնագետներ։ ԱՄՆ-ը և Հարավային Կորեան քննարկել են նաև ԿԺԴՀ-ի հետ նավթի առևտրի խնդիրը ՄԱԿ-ի Անվտանգության խորհրդի սահմանած քվոտան գերազանցող ծավալներով։

«Ինչպես հայտնի է բազմաթիվ հանրային զեկույցներից, մաքսանենգ զտված նավթի զգալի մասը ներմուծվում է Հյուսիսային Կորեա՝ տարածաշրջանի իրավաբանական և ֆիզիկական անձանց հետ անօրինական համագործակցության միջոցով: Կորեայի Հանրապետությունը և Միացյալ Նահանգները կքննարկեն այն անհատների և ընկերությունների դեմ անկախ պատժամիջոցներ սահմանելու հարցը, ովքեր ներգրավված են նավթի մաքսանենգության մեջ՝ որպես այդ անօրինական գործողություններն արմատախիլ անելու ջանքեր»,- նշել են Սեուլում։

«Հարավային Կորեան և ԱՄՆ-ը մտահոգություն են հայտնել, որ Հյուսիսային Կորեայի և Ռուսաստանի միջև մերձեցումից հետո առաջանում է ռուսական վերամշակված նավթի մատակարարման հնարավորությունը: Կողմերը քննարկել են առաջարկներ, որոնք կարող են դադարեցնել Ռուսաստանի և Հյուսիսային Կորեայի միջև անօրինական համագործակցությունը»,- ասվում է մամուլի հաղորդագրությունում։ Կողմերը կոչ են արել պահպանել ՄԱԿ-ի Անվտանգության խորհրդի բանաձևերը։

Ավելի վաղ Financial Times թերթը, հղում անելով արբանյակային պատկերներին և փորձագիտական ​​եզրակացությանը, հայտարարել էր, որ Ռուսաստանը, իբր, սկսել է նավթի ուղղակի մատակարարումները ԿԺԴՀ՝ խախտելով ՄԱԿ-ի պատժամիջոցները. մարտին հյուսիսկորեական հինգ տանկերն այցելել են ռուսական նավահանգիստ: Սրանք 2017 թվականից ի վեր ենթադրաբար առաջին ուղիղ ծովային առաքումն էին։ Ինչպես նշել է հրատարակությունը, ՄԱԿ-ը սահմանել է տարեկան 500 հազար բարել զտված նավթի սահմանափակում։ Փորձագետների կարծիքով՝ հյուսիսկորեական տանկերը կարող էին արտահանել 125 հազար բարել։ Մատակարարումները չեն համարվում պատժամիջոցների խախտում, եթե դրանք հաղորդվում են ՄԱԿ-ի համապատասխան մարմնին: