Միացյալ Նահանգներն ուժեղացնում է վերահսկողությունը Microsoft-ի, OpenAI-ի և Nvidia-ի հանդեպ

ԱՄՆ-ի արդարադատության նախարարությունն ու առևտրի դաշնային հանձնաժողովը համաձայնության են եկել, որը թույլ կտա նրանց հակամենաշնորհային հետաքննություն սկսել գերիշխող դիրք գրաված այնպիսի ընկերությունների նկատմամբ, ինչպիսիք են  Microsoft-ը, OpenAI-ն ու Nvidia-ն։ Այդ մասին հաղորդում է  Reuters-ը։

Գործարքի շրջանակում ԱՄՆ արդարադատության նախարարությունը պատավորություն է ստանձնել՝ հետաքննելու և պարզելու, թե արդյոք Nvidia-ն չի խախտել հակամենաշնորհային օրենսդրությունը։ Միևնույն ժամանակ, FTC-ը կուսումնասիրի OpenAI -ի և Microsoft-ի գործունեությունը։

OpenAI -ի և Microsoft-ի համագործակցությունը ևս գտնվում է ոչ պաշտոնական վերահսկողության տակ։

Աղբյուրը նշում է, որ FTC-ի ուշադրության կենտրոնում է գտնվում նաև Microsoft-ի մոտ 650 միլիոն արժողությամբ գործարքը Inflection AI ստարթափի հետ։ Այդ ուղղությամբ ընթացող հետաքննության մասին առաջին անգամ գրել է Wall Street Journal-ը։

OpenAI-ն և Nvidia-ն անմիջապես չեն արձագանքել այդ լուրին, բայց Microsoft-ը հայտարարել է, որ կատարել է իր իրավաբանական պարտավորությունները։

Այդ քայլերը, լրատվամիջոցի գնահատմամբ, ազդարարում են արհեստական ինտելեկտի ոլորտում վերահսկողության ուժեղացման մասին։