Արտահերթ նախագահական ընտրությունների երկրորդ փուլն Իրանում կկայանա հուլիսի 5-ին

Արտահերթ նախագահական ընտրությունների երկրորդ փուլն Իրանում կկայանա հուլիսի 5-ին։ Երկրորդ փուլ անցած երկու թեկնածուները՝ Մասուդ Փեզեշքիանը և Սաեդ Ջալիլին վաղվանից՝ հունիսի 30-ից, կարող են սկսել քարոզարշավը։ Այն տևելու է ընդամենը չորս օր՝ մինչև հուլիսի 3-ը։ Այս մասին հայտարարել է Իրանի ներքին գործերի նախարար Ահմադ Վադիդին։

Հիշեցնենք, որ Իրանի նախագահական ընտրություններում ավելի քան 14 մլն ընտրաթերթիկների հաշվարկից հետո երկրի առողջապահության նախկին նախարար Մասուդ Փեզեշքիանը առաջ է անցել երկրորդ տեղում ընթացող Սաիդ Ջալիլիից՝ միջուկային ծրագրի վերաբերյալ առաջատար բանակցողից, հավաքելով ընտրողների ձայների 42,32 տոկոսը։

Շաբաթ առավոտյան Իրանի ընտրական շտաբի մամուլի քարտուղար Մոհսեն Էսլամին նոր մանրամասներ է հայտնել ուրբաթ օրը կայացած նախագահական ընտրություններից. տեղի ժամանակով առավոտյան ժամը 08.20-ի դրությամբ հաշվարկվել էր 14 070 462 ձայն։ Վերջին տվյալներով՝ Մասուդ Փեզեշքիանը հավաքել է 5 955 781 ձայն, ինչը համապատասխանում է 42,32 տոկոսին։

Սաիդ Ջալիլին, որը զբաղեցրել է երկրորդ տեղը, հավաքել է ձայների 39,51 տոկոսը՝ ստանալով 5 560 321 ձայն, տեղեկացրել է Էսլամին։ Երկու մյուս թեկնածուները՝ Մոհամադ Բաղեր Գալիբաֆը եւ Մոսթաֆա Փուրմոհամադին, հավաքել են ձայների 13,44 եւ 0,79 տոկոսը։ Ավելի քան 61 մլն իրանցիներ քվեարկելու իրավունք ունեին 59 000 ընտրատեղամասերում ուրբաթ, ամբողջ երկրում։