ԱՄՆ-ն չի կարող խանգարել Իրանին՝ վաճառել իր նավթը․ Ջավադ Օուջի

Իրանի նավթի նախարար Ջավադ Օուջին հայտարարել է, որ Իրանը նավթ է արտահանում 17 երկրներ, այդ թվում՝ եվրոպական, այդ մասին հայտնում է Mehr գործակալությունը։

«Արտասահմանյան լրատվամիջոցները գրում են, որ Իրանը նավթ է արտահանում Եվրոպա։ Այո՛։ Ավելին, Իրանը նավթ է արտահանում աշխարհի 17 երկրներ»,- ասել է Ջավադ Օուջին։

Իրանի նավթի նախարարի խոսքով՝ Իրանը «տնտեսական պատերազմի մեջ է», ուստի ինքը զերծ կմնա վիճակագրական տվյալներ հրապարակելուց։

«Ինչ կառավարություն էլ որ իշխանության գա ԱՄՆ-ում, չի կարող ազդել իրանական նավթի վաճառքի վրա»,- հավելել է Օուջին։

Ավելի վաղ Financial Times թերթը, վկայակոչելով Vortexa վերլուծական ընկերությանը, գրել էր, որ իրանական նավթի արտահանումը հասել է վեց տարվա առավելագույն ծավալին՝ հիմնականում Չինաստան մատակարարումների հաշվին։ Ըստ պարբերականի, Իրանը 2024 թվականի առաջին երեք ամիսներին օրական մատակարարել է միջինը 1,56 միլիոն բարել, ինչը ամենաբարձր ցուցանիշն է՝ 2018 թվականից ի վեր։