Հաշված օրերից iPhone 16-ը կլինի վաճառքում

Apple-ն iPhone-ի նոր մոդելի ու մյուս նորույթների շնորհանդեսը պատրաստվում է անցկացնել սեպտեմբերի 10-ին։ Այդ մասին հաղորդում է ինսայդեր, Bloomberg-ի լրագրող Մարկ Գուրմանը։

Միջոցառման ընթացքում ընկերությունը նախատեսում է ներկայացնել iPhone 16-ը, Apple Watch Series 10-ն ու AirPods-ի նոր սերնդի բազային մոդելները։ Ականջակալների այդ շարքը առաջին անգամ կներկայացվի երկու տարբերակով՝ աղմուկի խլացմամբ ու առանց դրա։

Կանխատեսվում է, որ տասերորդ սերնդի Apple Watch ժամացույցները կունենան ավելի մեծ էկրան ու բարակ կաղապար։  Նոր iPhone 16-երը թարմացված դիզայնով են, իսկ Pro տարբերակն՝ ավելի մեծ էկրանով ու ավելի բարձր որակի տեսախցիկով։

Բացի նշված կետերից, iPhone 16-ի ողջ շարքն օժտված կլինի արհեստական բանականության՝  Apple Intelligence-ի գործիքներով՝ այն դեպքում, երբ նախորդ մոդելներից միայն iPhone 15 Pro-ն ու Pro Max-ն ունեին ԱԲ աջակցություն։

Աղբյուրը նշում է՝ սեպտեմբերի 10-ի շնորհանդեսը կարող է նշանակել, որ iPhone 16-ի վաճառքն ամբողջ աշխարհում կսկսվի արդեն 10 օրից՝ սեպտեմբերի 20-ից։

Գուրմանը նաև նկատում է՝ Apple-ն ընդլայնում է չորս նոր  Mac մոդելների  թեստավորումը, որոնք ունեն Apple M4 չիպ։ Ենթադրվում է, որ խոսքը Mac mini-ի, երկու MacBook Pro-երի ու  iMac-երի մասին է։ Միևնույն ժամանակ, թարմացված համակարգիչների շնորհանդեսը սպասվում է ավելի ուշ՝ 2024թ․ հոկտեմբերին։