Ադրբեջանը կդառնա՞ «Իսլամական պետության» հաջորդ թիրախը.The National Interest

Ադրբեջանում առկա սոցիալական և քաղաքական անհավասարությունը երկիրը խոցելի է դարձնում իսլամական արմատականության համար: Այս թեմային բավականին ծավալուն հրատարակմամբ  անդրադարձել է ամերիկյան The National Interest հանդեսը:

Հանդեսը գրում է, որ Բաքվի կենտրոնից դուրս աղքատությունն ակնհայտ է: Խորհրդային շրջանում կրթություն ստացած մարդիկ չեն կարողանում աշխատանք գտնել տնտեսության նոր ճյուղերում: Ադրբեջանում կաշառակերությունը բնութագրական է դարձել, մարդիկ ստիպված են կաշառք տալ անգամ ցածր վարձատրվող աշխատանքի ընդունվելու համար:
«Արմատական առաջնորդները կարող են օգտվել նման մթնոլորտից, իսկ Ադրբեջանի կառավարող շրջանները չեն ցանկանում լուծել այդ խնդիրները», -գրում է հանդեսը:

Նշվում է, որ վերջին տարիներին Ադրբեջանում ուժեղացել են բռնաճնշումները ժողովրդավարների, ընդդամիդիրների, իրավապաշտպանների և հասարակական ակտվիստների դեմ, ովքեր չեն կարողանում պաշտպանել իրենց: Ըստ հանդեսի` Ադրբեջանում փոփոխություններ են անհրաժեշտ, քանի որ մեծացել է իսլամիստական խմբավորումների նկատմամբ բնակչության հետաքրքրությունը:

Հանդեսի կարծիքով` վաղաժամ է պնդել, որ այսօրվա Ադրբեջանը, որի բնակչության 60 տոկոսը շիաներ, 40 տոկոսը սունիներ են, ապահովագրված է իսլամական արմատականությունից:

Նշվում է, որ Ադրբեջանում հավատացյալ անձինք հետապնդվում են առանց տարանջատման և այդպիսի քաղաքականությունը թույլ չի տալիս գտնել իսլամիստական շարժումների իրական քաղաքական նպատակները:

Հանդեսի կարծիքով` Ադրբեջանում արմատականության գրավչությունը կարող է նվազեցվել, եթե Իլհամ Ալիևի կառավարությունը պաշտպանի քաղաքացիական հասարակությանը, ինչը չի արվում:

Ադրբեջանական ԶԼՄ-ներն ավելի վաղ հայտնել էին, որ «Իրաքի և Լևանտի իսլամական պետություն» ահաբեկչական խմբավորման կազմում կռվող ադրբեջանցի ջիհադական մարտիկները հայրենք վերադառնալուց հետո կարող են «իսլամական ընդդիմություն» ստեղծել Ադրբեջանում:

Հետևեք մեզ նաև Telegram-ում