Այսօր Բաքվի ռազմական դատարանում կշարունակվի Արցախի նախկին պետնախարար Ռուբեն Վարդանյանի դատավարությունը

Այսօր Բաքվի ռազմական դատարանում կշարունակվի Արցախի նախկին պետնախարար, գործարար Ռուբեն Վարդանյանի դեմ կեղծ դատավարությունը: Տեղեկությունը հայտնում են ադրբեջանական ԶԼՄ-ները:

Հիշեցնենք՝ վերջին նիստում սկսվել է 2023 թվականի առևանգված և ապօրինի կալանք կրող Վարդանյանի դեմ շինծու գործով «մեղադրական եզրակացության եզրափակիչ մասը»։ Նախորդ նիստում դատախազն ընթերցել է «մեղադրական եզրակացությունը», ըստ որի Վարդանյանին առաջադրված  մեղադրանքները սկսվում են 1988 թվականից, երբ նա դեռ Մոսկվայի պետական համալսարանի ուսանող էր:

Վարդանյանի պաշտպանի կողմից ներկայացված բոլոր միջնորդությունները մերժվել են: Մինչև հիմա Արցախի նախկին պետնախարարի համար բանավոր թարգմանվել է մեղադրական եզրակացության և «ապացույցների» հինգ տոկոսից էլ քիչ մասը։ Իսկ նրա տեղի փաստաբանը կարողացել է ուսումնասիրել նյութերի միայն 20 տոկոսը:

Բացի այդ, նախորդ նիստին  Ռուբեն Վարդանյանի պաշտպանը միջնորդություն է ներկայացրել դատարանի կողմից նշանակված թարգմանչին բացարկ հայտնելու մասին, այն բանից հետո, երբ նրա թարգմանած փաստաթղթերում հայտնաբերվել են լուրջ անհամապատասխանություններ:

Հիշեցնենք, որ Ռուբեն Վարդանյանի գործն առանձնացված է: Արցախի նախկին նախագահների և մյուսների գործի հաջորդ նիստը փետրվարի 11-ին է։