ԱՄՆ-ն նոր` ավելի խիստ պահանջներ է ներկայացրել Ուկրաինային

Եվս մեկ լրատվամիջոց է գրում, որ ԱՄՆ-ի կողմից հանքանյութերի վերաբերյալ գործարքի պայմանները կտրուկ խստացվել են այն բանից հետո, երբ Զելենսկին մերժեց առաջին՝ ավելի մեղմ տարբերակը։

Նոր ամերիկյան առաջարկը ավելի լավը չէ, քան նախորդը, իսկ «որոշ դրույթներ թվում են ավելի խիստ, քան նախորդ նախագծում», գրում է New York Times-ը։

Ըստ թարմացված համաձայնագրի նախագծի՝ Ուկրաինան պետք է հրաժարվի իր բնական պաշարներից ստացվող եկամուտների կեսից, ներառյալ հանքանյութերը, գազը և նավթը, ինչպես նաև նավահանգիստներից ու այլ ենթակառուցվածքներից ստացվող մուտքերի կեսից։ Նման դրույթներ ներառված էին նաև փետրվարի 14-ի նախնական նախագծում։

Ուկրաինայի հանքանյութերից ստացվող եկամուտները կուղղվեն հիմնադրամ, որտեղ ԱՄՆ-ն կունենա 100% վերահսկողություն, և Ուկրաինան ստիպված կլինի մուծումներ կատարել այդ հիմնադրամին, մինչև այն հասնի 500 միլիարդ դոլարի՝ այն նույն գումարի, որը Թրամփը պահանջել էր որպես փոխհատուցում արդեն տրամադրված ամերիկյան աջակցության դիմաց։ Այս թիվը համաձայնագրի առաջին տարբերակում նշված չէր։

Բացի այդ, թարմացված նախագծում նշվում է, որ ԱՄՆ-ն կարող է վերաներդնել եկամուտների մի մասը Ուկրաինայի հետպատերազմյան վերականգնման մեջ, այդ թվում՝ ընդերքի մշակման և ենթակառուցվածքների կառուցման համար։

Հետաքրքիր է, որ նոր համաձայնագրի մեջ ներառվել են նաև դրույթներ այն տարածքներից ստացվող եկամուտների մասին, որոնք ներկայումս գտնվում են Ռուսաստանի վերահսկողության տակ։ Եթե Ուկրաինան վերագրավի այդ տարածքները, դրանցից ստացվող եկամուտների 66%-ը կգնա ԱՄՆ-ին։

Վեճերի լուծման իրավասությունը վերապահվել է Նյու Յորքի դատարանին, ինչը «անհանգստություն է առաջացրել ուկրաինական կողմի մոտ, քանի որ դա կարող է թուլացնել Ուկրաինայի իրավական դիրքերը հնարավոր վեճերի դեպքում»։

Ուկրաինան իր հերթին պահանջել է ամրապնդել ռազմական աջակցությունը և հետպատերազմյան անվտանգության երաշխիքներ տրամադրել, սակայն «նոր փաստաթուղթը չի նախատեսում ոչ մեկը, ոչ էլ մյուսը»։

Շաբաթ օրվա կեսին Ուկրաինան դեռ չէր հաստատել գործարքը, հավելում է լրատվամիջոցը։

Ավելի վաղ ուկրաինական ԶԼՄ-ները նույնպես հաղորդել էին, որ ամերիկացիների նոր առաջարկները ավելի կոշտ են, քան նախորդները։

Հետևեք մեզ նաև Telegram-ում