Պենտագոնի համար Northrop Grumman-ը արբանյակների լիցքավորման համակարգ կմշակի Northrop Grumman-ը

ԱՄՆ տիեզերական ուժերը և Ամերիկյան Northrop Grumman ռազմարդյունաբերական կոնցեռնը Elixir անվանումը ստացած ծրագրի շրջանակներում պայմանագիր են կնքել արբանյակների ուղեծրային վերալիցքավորման համակարգի մշակման և փորձարկման համար։ Այս մասին հայտնել է Defense News շաբաթաթերթը՝ վկայակոչելով ընկերության ներկայացուցչին։ 

Ըստ Defense News-ի՝ 2024 թվականին Northrop Grumman-ը, ԱՄՆ Տիեզերական ուժերի տիեզերական համակարգերի հրամանատարության պատվերով զբաղվել է GAS-T (Geosynchronous Auxiliary Support Tanker) կոչվող վերալիցքավորիչ-արբանյակի ստեղծմամբ։

Կոնցերնում նշում են, որ Elixir ծրագիրը թույլ կտա ավարտել արբանյակների լիցքավորման համակարգի մշակումը և իրականացնել GAS-T-ի փորձնական գործարկումը: Ընդ որում, փորձարկումների մեկնարկի ենթադրյալ ժամկետները, ինչպես նաև նոր պայմանագրի արժեքը կոնցեռնի ներկայացուցիչները չեն բացահայտել։

Ծրագրի ղեկավար Լորեն Սմիթի խոսքով՝ ընկերությունը պետք է լուծի երեք հիմնական խնդիր՝ ապահովի արբանյակների մերձեցումը անհրաժեշտ հեռավորության վրա, իրականացնի դրանց միացումն ու կարգավորի վառելիքի փոխանցումը մի տիեզերական ապարատից մյուսը։ Նախատեսվում է, որ վառելիք ուղեծիր հասցնելու համար կներգրավվի ROOSTER-5 (Rapid On-Orbit Space Technology Evaluation Ring) տիեզերանավը, որը, ինչպես ավելի վաղ հաղորդվել էր, պետք է թռիչքի գնա 2027 թվականին:

Defense News-ի փոխանցմամբ՝ ԱՄՆ տիեզերական ուժերը ուղեծրային լիցքավորումը դիտարկում են որպես տիեզերքում շարժունակության բարձրացման կարևոր բաղադրիչ, որը Պենտագոնը հատկապես արդիական է համարում Ռուսաստանի և Չինաստանի տիեզերական տեխնոլոգիաների զարգացման ֆոնին։