Ճապոնիայի տնտեսությունը մինչև 1,75 տրլն իեն կկորցնի ԱՄՆ-ի մաքսատուրքերի պատճառով

ԱՄՆ-ի կողմից ներմուծվող ավտոմեքենաների համար 25%-ի չափով լրացուցիչ մաքսատուրքերի սահմանումը կհանգեցնի Ճապոնիայի տնտեսության համար մինչև 1,75 տրիլիոն իեն (11,74 մլրդ դոլար) կորուստի։ NHK հեռուստաալիքի փոխանցմամբ այս հաշվարկն իրականացրել է SMBC Nikko Securities Inc արժեթղթերի խոշոր ընկերությունը։

SMBC Nikko Securities Inc. հաշվարկն իրականացրել է՝ հաշվի առնելով ոչ միայն երկրի ավտոարդյունաբերության, այլև դրա հետ կապված ոլորտների վրա համապարփակ ազդեցությունը, նշել է հեռուստաալիքը։ Ընկերության ներկայացրած տվյալներից հետևում է, որ ճապոնական տնտեսության առավելագույն կորուստները կկազմեն մինչև 1,75 տրիլիոն իեն (11,74 միլիարդ դոլար):

Ավելի վաղ ԱՄՆ նախագահ Դոնալդ Թրամփը հայտարարել էր, որ երկրի սահմաններից դուրս արտադրված ավտոմեքենաների համար 25%-ի չափով նոր մաքսատուրքն ուժի մեջ կմտնի ապրիլի 2-ից:

Ներկայումս ԱՄՆ-ում ճապոնական մեքենաների տուրքերը կազմում են 2,5%: 2024 թվականի արդյունքներով ճապոնական մեքենաների արտահանումն ԱՄՆ կազմել է 6,026 տրիլիոն իեն (մոտ 40 միլիարդ դոլար), ինչը կազմում է ԱՄՆ ճապոնական ամբողջ արտահանման 28,3%-ը։

Ճապոնիայի կառավարությունը բազմիցս հայտարարել է, որ շարունակելու է բացատրական աշխատանքներ տանել ԱՄՆ-ի հետ՝ ապացուցելով, որ ճապոնական ավտոարտադրողները 61 միլիարդ դոլարի ուղղակի ներդրումներ են կատարել ԱՄՆ-ում և 2,3 միլիոն մարդու աշխատատեղեր են տրամադրել, ուստի Ճապոնիային տուրքերի ենթակա երկրների ցանկում ներառելը անարդար կլինի։