Մեքենայական ուսուցման առաջին դպրոցական օլիմպիադան Հայաստանում․ Հայտնի են «ԱԲ սերունդ» ծրագրի օլիմպիադաների արդյունքները
Նմանատիպ
Մեքենայական ուսուցումն ավելանում է այն առարկաների թվին, որոնցում այսուհետ իրենց ուժերն են կարողանալու փորձել «Արհեստական բանականության (ԱԲ) սերունդ» դպրոցական ծրագրի մասնակիցները։
Ապրիլի 1-ին Հայաստանի գիտության և տեխնոլոգիաների հիմնադրամը (FAST) ամփոփել է 2023-ից ՀՀ ԿԳՄՍ նախարարության հետ համատեղ ՀՀ 7 մարզում ԱԲ կրթության հայկական մոդելը փորձարկվող ծրագրի օլիմպիադաների շրջանը, որին մասնակից են դարձել ավագ դպրոցների 456 աշակերտ (10-րդ և 11-րդ դասարանցիներ)։
Լրացնելով դեռևս անցած տարի աշակերտներին հասանելի Python ծրագրավորման լեզվի և խորացված հանրահաշվի առարկայախումբը՝ մեքենայական ուսուցումը դարձել է երրորդ առարկան, որն ընթացիկ ուստարուց սկսած հասանելի է դարձել աշակերտներին ու դասավանդվում է ոլորտից հրավիրված ԱԲ մասնագետների ուղղորդմամբ։
Փետրվարին անցած երեք առարկայական օլիմպիադաների ընդհանրացված արդյունքների հիման վրա հաղթող են ճանաչվել Վանաձորի թիվ 11 ավագ դպրոցի, Վանաձորի Էվրիկա հատուկ դպրոցի և Հրազդանի թիվ 1 ավագ դպրոցի 6 աշակերտ, գրանցելով 99-ից մինչև 94.3 միավոր։ Առանձին առարկաներում 100 հնարավորից 90 և ավելի միավոր վաստակած ևս 25 աշակերտ արժանացել են խրախուսական մրցանակների։
Մրցանակաբաշխությունը կայացել է Zema տեխնոլոգիական ընկերությունում՝ պատանիների համար մասնագիտական կողմնորոշման բաղադրիչով։ Միջոցառմանը ծրագրի ղեկավար Անուշ Այվազյանը նշել է․ «Օլիմպիադաների այս տարվա արդյունքները ցույց տվեցին, որ մեր աշակերտները հսկայական ներուժ ունեն արհեստական բանականության և մաթեմատիկայի ոլորտում մրցունակ մասնագետներ լինելու համար։ Այս պատանիներն արդեն իրականացնում են իրենց առաջին նախագծերը, ունեն մաթեմատիկայի, Python-ի և մեքենայական ուսուցման խորքային գիտելիք և մտածում են սեփական ԱԲ մոդելների մշակման մասին։ Վստահ եմ, որ ծրագրի ընդլայնումը ողջ Հայաստանում կնպաստի մեր երկրի մրցունակության բարձրացմանը»։
«ԱԲ սերունդ»-ը եռամյա ծրագիր է, որը հնարավորություն է տալիս ավագ դպրոցի աշակերտներին անվճար ուսումնասիրելու խորացված հանրահաշիվ, Python և մեքենայական և խորը ուսուցում, ինչպես նաև անցնել մասնագիտական կողմնորոշման և փափուկ հմտությունների զարգացման դասընթացներ։ Գալիք՝ 2025-2026 ուստարում ծրագիրը հասանելի է դառնալու բոլոր մարզերում։ Այս պահին FAST-ը նախարարության հետ համատեղ դպրոցների ընդլայնված կազմի ընտրության փուլում է, սակայն նախագրանցումն արդեն բաց է 9-րդ դասարանն այս տարի ավարտող աշակերտների համար։
Հայաստանի գիտության և տեխնոլոգիաների հիմնադրամը (FAST) ստեղծվել է 2017-ին Հայաստանում տեխնոլոգիական նորարարությունն ու գիտական առաջընթացը խթանող էկոհամակարգ ստեղծելու նպատակով: Այս ուղղությամբ հիմնադրամն իրականացնում է կրթական, գիտական և գիտական արդյունքի առևտրայնացման նախագծեր՝ ամբողջացնելով նորարարական մտքի ձևավորումից մինչև դրա նյութականացում տանող շղթան: Իր գործունեության յոթ տարվա ընթացքում հիմնադրամն իրականացրել է 28 ծրագիր՝ հասնելով ավելի քան 19 600 շահառուի։
«ԱԲ սերունդ» դպրոցական ծրագիրը FAST-ի համանուն ծրագրի առաջին բաղադրիչն է, որը կոչված է ձևավորելու ոլորտում ապագա նորարարի կրթական ողջ ուղին՝ ավագ դպրոցից մինչև դոկտորական մակարդակ:
