Բաքուն Հայաստանից ականապատ տարածքների «ճշգրիտ քարտեզներ» է պահանջում

Հայաստանի կողմից Ադրբեջանին տրամադրված ականապատ քարտեզների ճշգրտությունը կազմել է 25 տոկոս: Այս մասին հայտարարել է Ադրբեջանի ԱԳՆ մամուլի խոսնակ Այխան Հաջիզադեն։

«Չնայած միջազգային ճնշումից հետո Հայաստանը տրամադրել է որոշ քարտեզներ, սակայն դրանք ընդգրկել են ականապատ տարածքների միայն մի փոքր մասը՝ 25 տոկոսը։ Ականների պայթյունների վերջին դեպքերի ավելի քան 55 տոկոսը տեղի է ունեցել այդ քարտեզներում չընդգրկված տարածքներում»,- ասել է նա։

Հաջիզադեյի համոզմամբ՝ Հայաստանի քարտեզները ցույց են տալիս 400,000 ականների տեղակայման վայրերը, սակայն, նրա պնդմամբ, «իրական թիվը մոտենում է 1,5 մլն-ի»․

«Այս կապակցությամբ մենք կարծում ենք՝ շատ կարևոր է, որ միջազգային հանրությունը հետևողական գործողություններ ձեռնարկի Հայաստանի կողմից բխող ականների սպառնալիքը դատապարտելու համար, և մենք ակնկալում ենք, որ Երևանը կտրամադրի բոլոր ականապատ տարածքների ճշգրիտ քարտեզները, որոնք դեռևս ամբողջությամբ չեն փոխանցվել Ադրբեջանին»։