Նիկոլ Փաշինյանը հայտարարել է Հանրային խորհրդի կազմավորման մասին

Հայաստանի վարչապետ Նիկոլ Փաշինյանը հայտարարություն է տարածել Հանրային խորհրդի կազմավորման մասին․

Վարչապետը հայտնել է, որ սահմանված կարգով ընտրված Հանրային խորհրդի 45 անդամների կազմից Հանրային խորհրդի նախագահի թեկնածությունը ներկայացրել է ՀՀ կառավարության քննարկմանը։

«Կառավարության 2025 թվականի ապրիլի 9-ի N 389-Ա որոշմամբ Հանրային խորհրդի նախագահ է նշանակվել Արայիկ Խզմալյանը։ 2025 թվականի ապրիլի 10-ից Հանրային խորհուրդը համարվում է կազմավորված»,- ասված է վարչապետի հայտարարության մեջ։

Հանրային խորհուրդը ստեղծվել է 2008 թվականի հուլիսի 12-ին: 2009 թվականի մարտի 11-ին հաստատվել է Հանրային խորհրդի կանոնադրությունը և առաջին 12 անդամների կազմը: Հանրային Խորհուրդն ունի խորհրդատվական մարմնի կարգավիճակ: Կառույցը 2021 թվականի մայիսից չուներ նախագահ, ինչպես նաև թափուր էին անդամների տեղերը: 2019 թվականի դեկտեմբերի 19-ին Ստյոպա Սաֆարյանը նշանակվել էր Հանրային խորհրդի նախագահ։ Նա այդ պաշտոնում մնաց մինչև 2021 թվականի մայիս, այնուհետև հրաժարական տվեց 2021 թվականի արտահերթ խորհրդարանական ընտրություններին մասնակցելու համար։