Կոմիտաս, բիբլիական Արարատ, հայկական նուռ. հայի պատմության ավազե անիմացիայով բացվեց «Ֆրեսկո» փառատոնը (ֆոտո)

Բարու  փառատոն. հայի պատմության  ավազե  անիմացիայով և  հայկական ռոքով Կարապի լճում  տրվեց  «Ֆրեսկո» արդի արվեստի և  հոգևոր  ֆիլմերի 2-րդ  փառատոնի մեկնարկը, որի ժամանակ հնչեց նաև հոգևոր և  ազգագրական երաժշտություն:

Փակման հանդիսավոր արարողությունը տեղի կունենա հուլիսի 5-ին Մայր Աթոռ Սուրբ Էջմիածնի տարածքում. այս տարի փառատոնը Մայր աթոռի աջակցությամբ է  նաև:

«Սա միջկրոնական, միջմշակութային երկխոսության վառ  վկայություն է: Ավելին՝ 21-րդ դարի  մարդը  մեկուսացված է, և  այս ու  նման այլ  փառատոններն օգնելու են դուրս  գալ այդ  մեկուսացումից, ինչպես նաև սիրո և ատելության բախման դարում քայլել տալ սիրո և լույսի ճանապարհով»,- ասում է Մայր Աթոռի հայեցակարգային գրասենյակի ղեկավար, փառատոնի հոգևոր խորհրդատու  Տ. Բագրատ եպիսկոպոս Գալստանյանը:

Ի դեպ,  «Ֆրեսկոյի» այս տարվա նորություններից մեկը «Հավատ առանց սահմանների» ֆոտոցուցահանդեսն է, որտեղ ներկայացված են  հայտնի  իսրայելցի լուսանկարիչ Դմիտրի Բրիկմանի աշխատանքները, ինչպես նաև Հայ առաքելական եկեղեցին ներկայացնող այլ   լուսանկարներ:

Փառատոնի նախօրեին Դմիտրի Բրիկմաննն ասաց, որ ընդամենը մեկ օր է մեր երկրում,  բայց արդեն հմայված եմ Հայաստանով  ու հայերով, հետո ավելացրեց, որ թարգմանությունն (երբ տեքստերը թարգմանում են լուսանկարների լեզվով) իր մոտ հատկապես լավ է ստացվում հայկական դուդուկի երաժշտության ներքո, ինչի համար երախտապարտ է  Ջիվան  Գասպարյանին: Իսկ այսօր Times.am–ի հետ ոչ պաշտոնական զրույցում ասաց, որ այսօր դուդուկ է գնել, որի փորձարկումը վաճառողն իր սիրած «Դլե յաման»-ով  է կատարել:

Իր հերթին փառատոնի հատուկ  հյուր՝  ավազանկարչուհի Դարյա Կոտյուխը, ով Սանկտ Պետերբուրգի «Ветер» ավազե անիմացիայի ստուդիայի հիմնադիրն է,  պատմեց, որ Հայաստանում առաջին անգամ է և դեռ երկու օր, բայց առաջին իսկ վայրկյաններից հարազատություն է զգացել  հողից, ջրից, բնությունից, ուստի անպայման աշխատելու  է  նորից այցելել: Դարյայի ավազանկարչության թեման ինչպես վերևում նշեցինք՝  հայի պատմությունն էր՝ Կոմիտաս, Արարատ լեռ, հայկական նուռ, վանքեր: 

«2015-ը հայերի համար յուրահատուկ տարի է՝ Հայոց ցեղասպանության 100-րդ տարելիցն է, իսկ այդ իրադարձությունները  Կոմիտասի երաժշտության վրա թողել են իրենց ազդեցությունը: Փորձել եմ ինչ-որ կերպ ավազի միջոցով փոխանցել Կոմիտասի ապրումները, թեպետ այն դժվար է տրվել, քանի որ ռուսերեն լեզվով Կոմիտասի մասին շատ բան գտնել  հնարավոր չէ»,- նշեց Դարյան:

Ինչին ի պատասխան տեղեկացրեցի, որ Երևանում  բացվել է Կոմիտասի թանգարան-ինստիտուտ,  որտեղ այցելելով կարող է շատ բան իմանալ  Վարդապետի մասին,  ինչը մեծ ոգևորությամբ և ուրախությամբ ընդունվեց. ամուսնու հետ անպայման կայցելի:

Հավելենք, որ փառատոնում ընդգրկված  ֆիլմերի բացօթյա դիտումները կազմակերպվելու են ամեն օր Կարապի լճի տարածքում, իսկ   փառատոնային  օրերից երեքը՝  հուլիսի 2-ից 4-ը, անցկացվելու են  Շիրակի մարզում՝ Հառիճավանքի տարածքում՝ վրանային կինոճամբարի  ձևաչափով: 

Մարիամ ՊԵՏՐՈՍՅԱՆ