Իրանում կոչ են անում հայ գործարարներին արտոնյալ պայմաններով ներդրումներ կատարել Արաս ազատ տնտեսական գոտում

Իրանում կոչ են անում հայ գործարարներին ներդրումներ կատարել Հայաստանի հետ սահմանակից Արաս ազատ տնտեսական գոտում:

Հայ լրագրողների հետ հանդիպման ժամանակ Արաս առևտրային գոտու ղեկավար, Իրանի Մեջլիսի պատգամավոր Արաբբաղեն Մոհսենն իր ելույթում բարձր գնահատելով հայ իրանական հարաբերությունների ներկա մակարդակը,այնուամենայնիվ, շեշտեց, որ դրանք զարգացնելու և խորացնելու անհրաժեշտություն կա: Չնայած քաղաքական մակարդակում եղած սերտ համագործակցությանը, տնտեսական գործակցության ցուցիչները բավարար չեն: Նրա կարծիքով, հայ և իրանցի ժողովուրդների միջև առկա դարավոր կապերը և բարեկամական նախատրամադրվածությունը թույլ կտան սերտացնել նաև առևտրա-տնտեսական կապերը:

Իսկ Արաս ազատ գոտին բացառիկ հնարավորություն է ընձեռում երկու ժողովուրդներին ամուր հիմքերի վրա դնել տնտեսական համագործակցությունը:

«Վերջին ժամանակներս այս տարածաշրջանում առևտրային մեծ շարժ է նկատվում: ժամանակն է այս ամենը գործնական կիրառություն ունենա: Մենք մեծ արդյունաբերություն ունենք, իսկ Հայաստանը` մարդկային մեծ պոտենցիալ: Որոշ երկրներում լավագույն մասնագետները հայեր են: Կարծում եմ, որևէ խնդիր չի առաջանա, քանի որ ազատ գոտում բացառիկ պայմաններ են ստեղծված արդյուաբերություն կազմակերպելու և արտահանելու համար»:

2003թ-ի օգոստոսին Իրանի Իսլամական Հանրապետության խորհրդարանը հաստատեց Արաս ազատ գոտու ստեղծման մասին օրենքը: Այս օրենքով նախապայմաններ ստեղծվեց իրանական տնտեսության զարգացման համար:

Արաս առևտրի գոտին գտնվում է Արաքս գետի ափին, երկրի հյուսիս-կենտրոնական հատվածում: Այն սահմանակից է Հայաստանի, Ադրբեջանի և Նախիջևանի հանրապետություններին: Հսկայական մակերևույթ զբաղեցնող այս գոտին (52000) հա համարվում է Իրանի ամենամեծ առևտրի գոտիններից մեկը:

Այն տնտեսապես արագ զարգացող տարածաշրջան է, որտեղ  գրեթե տաս տարվա ընթացքում ներդրումները 11-ից հասել է 120 միլիոն դոլարի, իսկ արտահանումը` 44-ից 506 միլիոն դոլարի:

Արաս առևտրային գոտին լայն հնարավորություններ և բարենպաստ պայմաններ է ստեղծում ոչ միայն տեղական ներդրողների, այլ նաև օտարերկյան գործարարների համար:Ներդրողները քսան տարվա ընթացքում ազատվում են հարկերից, օգտվում են մատչելի էներգիայի և գազի օգտագործման հնարավորություններին և բազմաթիվ այլ արտանոթյուններից, որոնք կախված են արդյունաբերության կազմակերպման ոլորտի հետ:

Աննա Բարսեղյան