Զելենսկու աղմկահարույց ելույթը ՄԱԿ-ում․ Մոսկվայի պատասխանը
Կարդացեք նաև
ՄԱԿ-ի Գլխավոր վեհաժողովի շրջանակում Ուկրաինայի նախագահ Վոլոդիմիր Զելենսկին հանդես է եկել ելույթով՝ կոչ անելով միջազգային համայնքին չթուլացնել տնտեսական և քաղաքական ճնշումը Ռուսաստանի Դաշնության վրա։ Ուկրաինայի ղեկավարի խոսքով՝ հակամարտության դադարեցման հիմնական նախապայմանը Ռուսաստանի՝ ռազմական գործողությունները ֆինանսավորելու կարողության սահմանափակումն է։
Զելենսկին նշել է, որ ռուսական կողմը շարունակում է ընդլայնել հակամարտության աշխարհագրությունը՝ ներգրավելով արտասահմանյան քաղաքացիների և ռազմական համագործակցություն ծավալելով Հյուսիսային Կորեայի հետ։ Նա նաև անդրադարձել է սպասվող ձմռան մարտահրավերներին՝ ընդգծելով, որ էներգետիկ ենթակառուցվածքներին հասցվող հարվածների դեպքում ուկրաինական կողմը պատասխան քայլեր է ձեռնարկելու։
Ելույթի առանցքային թեմաներից է եղել անօդաչու թռչող սարքերի (ԱԹՍ) կիրառումը։ Զելենսկու փոխանցմամբ՝ ընթացիկ տարում Ռուսաստանն Ուկրաինայի ուղղությամբ կիրառել է շուրջ 63 հազար տարբեր տեսակի ԱԹՍ-ներ։ Միևնույն ժամանակ, Կիևն ակտիվացնում է սեփական արտադրությունն ու միջազգային համագործակցությունը Ֆինլանդիայի, Ավստրալիայի և Կանադայի հետ։
Զուգահեռաբար, ռուսական կողմը վերահաստատում է իր դիրքորոշումը բանակցությունների վերաբերյալ։ ՄԱԿ-ի Անվտանգության խորհրդի նիստում ՌԴ արտաքին գործերի նախարար Սերգեյ Լավրովը հայտարարել է, որ Մոսկվան բաց է երկխոսության համար, սակայն դեմ է կրակի սոսկ ժամանակավոր դադարեցմանը, ինչը, նրա գնահատմամբ, հակառակորդին ժամանակ կտա վերազինվելու համար։
ՄԱԿ-ի միջոցառումների շրջանակում Զելենսկին հանդիպել է նաև ԱՄՆ նախագահ Դոնալդ Թրամփի հետ։ Քննարկումներից հետո Ուկրաինայի նախագահը հայտնել է, որ ամերիկյան կողմին առաջարկել է դիվանագիտական խողովակներով դիմել Չինաստանին՝ հակամարտության էսկալացիան նվազեցնելու նպատակով։
Ռազմական գործողությունները ճակատային գծում և օդային հարվածները շարունակվում են երկու կողմերից։ Վերջին ժամերին հրթիռային և անօդաչու սարքերով հարվածներ են արձանագրվել Կիևում, Զապորոժիեում և Խարկովի մարզում, ինչի հետևանքով կան զոհեր և քաղաքացիական ենթակառուցվածքների ավերածություններ։ Ռուսաստանի Պաշտպանության նախարարությունը, իր հերթին, հայտնել է հակաօդային պաշտպանության համակարգերի կողմից ուկրաինական հարյուրավոր ԱԹՍ-ների խոցման մասին։
Հետևեք մեզ նաև Telegram-ում