Միջազգային դաշինքը ԻՊ-ի մարտական ստորաբաժանումներ է ոչնչացրել Սիրիայում և Իրաքում

Մեկ օրվա ընթացքում ԱՄՆ-ը և դաշնակից երկրները 19 օդային հարվածներ են հասցրել Սիրիայում և Իրաքում ԻՊ-ի դիրքերի ուղղությամբ:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, հարվածներից 6-ն ուղղվել են Իրաքի և 13-ը՝ Սիրիայի վրա:

Ռմբակոծության արդյունքում սիրիական Քոբանի քաղաքի մերձակայքում ահաբեկիչների մարտական 12 ստորաբաժանում են ոչնչացվել: Իսկ Իրաքում ռմբակոծության են ենթարկվել Մոսուլի, ալ Ասադի, Քիրքուքի և Սինջարի մերձակայքում ահաբեկիչների դիրքերը: Ոչնչացվել են ահաբեկիչների մի քանի ստորաբաժանումներ:

Իրաքյան Մոսուլ քաղաքում միջազգային դաշինքի օդային հարվածների հետևանքով «Իսլամական պետության» տասնյակ ահաբեկիչներ են սպանվել և վիրավորվել: Այս մասին հայտարարել են Իրաքի անվտանգության աղբյուրները: Միջազգային դաշինքը ռմբակոծել է Քանունա և Այն ալ Ալի գյուղերի միջև գտնվող տարածքը: Նախորդ շաբաթվա ընթացքում ռազմական գործողությունների արդյունքում ԻՊ-ի 434 ահաբեկիչներ են սպանվել և վիրավորվել:

Դիյալա մարզում ռազմական գործողությունների ընթացքում հայտնաբերվել են ԻՊ-ի ղեկավարների 60 գերեզմաններ: