Եթե մենք որևէ հանցանք ունենք, եթե վճարելու բան ունենք, որպես Թուրքիա պետություն, կանենք անհրաժեշտ քայլերը. Էրդողան
Նմանատիպ
Հայոց ցեղասպանության 100-րդ տարելիցին ընդառաջ Թուրքիայի նախագահ Ռեջեփ Թայիփ Էրդողանը կրկնել է չարչրկված իր թեզը պատմաբանների հանձնաժողով ստեղծելու վերաբերյալ: Այն ժամանակին սպառիչ պատասխան էր ստացել հայկական կողմից, բայց դա չի խանգարել Էրդողանին լրագրողների հետ հանդիպման ժամանակ, պատասխանելով հարցերին, կրկին անդրադառնալ թեմային: Լրագրողի այն հարցին, թե ինչ նախապատրաստությունների մեջ է Թուրքիան Ցեղասպանության հարյուրերորդ տարելիցին ընդառաջ և ՀՀ Նախագահ Սերժ Սարգսյանին արած հրավերից հետո ինչ հունով են զարգանալու հարաբերությունները` Էրդողանը հիշեցրել է նախորդ տարվա ապրիլին իր ցավակցական ուղերձը` դժգոհելով, որ Հայաստանը դրան դրական պատասխան չտվեց, մինչդեռ այլ պետությունների ղեկավարներն իրենց գոհունակությունն են հայտնել դրանց կապակցությամբ:
Թուրքիայի նախագահը նկատել է, թե հայկական սփյուռքն այս հարցում հանգիստ չի մնում և շարունակում է գործողություններ ծավալել: Էրդողանի ձևակերպմամբ՝ «հայկական սփյուռքը շարունակում է ուշադրություն շեղելու աշխատանքը»: «Մենք նման բանն ընդունել չենք կարող»,- ասել է Թուրքիայի նախագահը՝ հավելելով, որ իրենք «պարտավոր չեն ընդունել» Հայոց ցեղասպանությունը:
«Մենք հայտարարում ենք, որ եթե այս հարցում անկեղծ եք, եկեք այս հարցը թողնենք պատմաբաններին: Թող այս հարցով զբաղվեն պատմաբանները»,- նշել է Էրդողանը` հայտարարելով, թե իբր թուրքական արխիվները բաց են և շուրջ մեկ միլիոն փաստաթուղթ պատրաստ է ուսումնասիրման: Նա կոչ է արել Հայաստանին և երրորդ երկրներին ևս բացել արխիվները, եթե ունեն այդպիսիք: Էրդողանը նշել է, որ պատմաբանների ուսումնասիրություններից և համապատասխան զեկույցներ իրենց ներկայացնելուց հետո միայն քաղաքական գործիչները կնստեն սեղանի շուրջ:
Եթե մենք որևէ հանցանք ունենք, եթե վճարելու բան ունենք, մենք, որպես Թուրքիա պետություն, կանենք անհրաժեշտ քայլերը: Սակայն միակ բանը, որ անում են հայերը՝ «Թուրքիան մեղավոր է» ասելն է»,- ասել է նա:
Հետևեք մեզ նաև Telegram-ում