«Լենինականցին չոքող չէ իշխանության դեմ». Գյումրեցի տաքսիստները ոտքի են կանգնել. տեսանյութ
Նմանատիպ
Գյումրեցի անհատ տաքսիստներն իրենց դժգոհությունն են հայտնում տաքսի վարելու լիցենզավորման նոր կարգի դեմ: 12 հազար դրամ վճարումն ու հաշվիչների պարտադիր տեղադրումը համարում են անհնար: Գյումրիում տաքսիստներն ի վիճակի չեն մտնել հարկային դաշտ, միանշանակ հայտարարում են տաքսու վարորդները՝ խորհուրդ տալով համապատասխան մարմիններին Շիրակի մարզի, Գյումրիի վարորդների համար սահմանել արտոնություններ:
Տաքսի ծառայությունների գործունեության նոր օրենքը նրանք նաեւ թերի են համարում:
«Ինչ գուզեն էս քյասիբ ժողովրդից էս կառավարությունը, էս չեղած կառավարությունը: Հիմի էլ ընկել են տաքսիների հետեւից: Ես օրը մեկ կամ երկու պասադկա կենեմ, 7 հոգի կպահեմ…»:
«Մեր ղեկավարությունից առաջին հերթին պահանջում եմ՝ թող ստեղծեն աշխատատեղեր, որպեսզի ժողովուրդը կարողանա աշխատել: Ի վիճակի չենք, փող չենք աշխատի, որ տանինք վճարենք»,- բարձրաձայնում են տաքսու վարորդները:
Տաքսիստները նշում են, որ գնալով երկրում վիճակն ավելի է վատթարանում, մարդիկ վճարունակ չեն, եւ հիմա պարտադրել նոր օրենք անհեթեթ են համարում:
«Մենք ի վիճակի չենք: Երեւանն ու մյուս քաղաքները համեմատել չի լինի: Իրենք դրեցին նույն ստանդարտ Երեւանի գինը: Մենք հրաժարվեցինք, չմուծեցինք: Անցավ քանի տարի, ժողովրդի վիճակը շա՞տ լավացավ, հա՞, որ որոշել են դնել մեզի էս ձեւի չոքցնել: Մենք չոքող չենք, մանավանդ լենինականցին չոքող չէ հեչ մի իշխանության դեմ: Լենինականցին քանի մը օր առաջ իրա չչոքելը ցույց տվեց, ու չենք էլ չոքի ու իշխանությանը չենք ենթարկվի»,- ԳԱԼԱ-ի հետ զրույցում ասում էին վարորդները:
Հիշեցնենք, որ նոր կարգը պարտադրում է՝ լիզենզավորված բոլոր տաքսիները պետք է ունենան հաշվիչ, հաշվիչները պետք է լինեն ստուգաչափված, իսկ դեղին պետհամարանիշ կրելու պահանջը հանվել է:
Հարկ է նշել, որ տաքսիների լիցենզավորման նոր պայմանները պարտադրում են, որ վարորդները հանրապետության ամենահեռավոր մարզերից պետք է հասնեն Երեւան հաշվիչները ստուգաչափելու:
Հետևեք մեզ նաև Telegram-ում