Մեր դժբախտությունները նրանից են, որ միշտ քարկոծել ենք գործ անողին. Շարմազանովը՝ Ս. Օհանյանի դեմ «վայրահաչոցների» մասին (տեսանյութ)

«Զինծառայողների և նրանց ընտանիքների անդամների սոցիալական ապահովության  մասին» ՀՀ օրենքում լրացումներ ու փոփոխություններ կատարելու օրենքի նախագիծն ապացուցեց, որ  ՀՀ ԱԺ-ի, իշխանության և ընդդիմության համար անվտանգության ու պաշտպանության հարցերը գերկարևոր են: Այս մասին  ԱԺ-ում արտահերթ կարգով հայտարարեց ԱԺ փոխնախագահ Էդուարդ Շարմազանովը՝ «Զինծառայողների և նրանց ընտանիքների անդամների սոցիալական ապահովության մասին» ՀՀ օրենքում լրացումներ ու փոփոխություններ կատարելու օրենքի նախագծի քննարկմանը: 

«Մենք պետք է գիտակցենք , որ առանց ուժեղ անվտանգության համակարգի մենք չենք կարող խոսել ո՛չ ժողովրդվարության զարգացումից, ո՛չ տնտեսական աճից, ո՛չ սոցիալական իրավիճակի բարելավումից և որևէ հարցից, այդ իմաստով այս նախագիծը գալիս է ապացուցելու, որ այո՛, ՀՀ-ն չնայած ունի բազում չլուծված խնդիրներ, բայց առաջնային խնդիրները մեր զինվորների խնդիրներն են»,-շարունակեց նա՝ ընդգծելով, որ պաշտպանության ոլորտը մեր երկրի ողնաշարն է: 

Այս  համատեքստում Շարմազանովը շեշտեց, որ ՀՀ անկախությունը երկրից մանանայի պես չի թափել, և որի երաշխիքը Հայոց բանակն է, ուստի  ցանկացած վայրահաչոց բանակի ու բանակի պատասխանատուի նկատմամբ՝ վայրահաչոց է հայրենիքի նկատմամբ:

«Իհարկե,  իշանություններին պետք է քննադատել, բայց չի կարելի նույնացնել իշխանությունն ու հայրենիքը, չի կարելի ամեն ինչի չափը անցնել: Ի վերջո, չպետք է անել այն, ինչը ձեռնտու է մեր հարևաններին: Քայլ կատարելուց առաջ պետք է մինչև տասը հաշվել, թե չէ համընդհանուր սենսացիայի հետևից ենք ընկել՝  ով ինչքան «լայք» կհավաքի, ինչ նյութեր կանենք: Հետո՞, մեր բոլոր դժբախտությունների պատճառը եղել է այն, որ միշտ քարկոծել ենք  նրան, ով գործ է անում, ինչպես կասեր Նժդեհը՝ հայի թիվ մեկ թշնամին հայի ներքին նախանձն է: Բերեք լինենք քրիստոնյա, ձերբազատվենք էդ ներքին նախանձից,  հերիք է ապրենք  ընդդեմ ինչ-որ մեկի կամ ինադու, այլ բերեք ապրենք հանուն: Ամոթ է, եկե՛ք սիրենք մեր հայրենիքը, պաշտպանենք ու փայփայենք մեր բանակն ու բանակի պատասխանատուներին, մեր զինվորին, որովհետև մեր զինվորն ավելի ուժեղ է, երբ թիկունքն ամուր է: Բանակը, պաշտպանության նախարարությունը, զինվորը բոլորինս է, իշխանությունն իր հոր տնից չի բերել»,– եզրափակեց  ԱԺ փոխնախագահը: