Կվերամշակվեն պոչամբարներում կուտակված արտադրական լցակույտերը. 1500 մարդ աշխատանք կունենա (տեսանյութ)

Կառավարությունն Ազգային ժողովի քննարկմանն է ներկայացրել օրենքի նախագիծ, որի ընդունումը կնպաստի Հայաստանում ներդրումների իրականացմանը և մի շարք էկոլոգիական խնդիրների լուծմանը:

Հիմնական զեկուցող, ՀՀ էներգետիկայի և բնական պաշարների նախարարի տեղակալ Արեգ Գալստյանն ընդգծեց, որ օրենքի ընդունման արդյունքում և դրա հիման վրա  ներդրումային ծրագրով կիրականացվի  «Զանգեզուրի պղնձամոլիբդենային կոմբինատ»-ի պոչամբարներում  կուտակված  արտադրական լցակույտերի  վերամշակում:

Նրա տեղեկացմամբ, «Զանգեզուրի պղնձամոլիբդենային կոմբինատ»-ն ունի կոնսերվացված երկու պոչամբար՝ Ողջին և Փխրուտը, որոնց ծավալները համեմատաբար փոքր են: 

«Արծվանիկի պոչամբարն ամենախոշորն է, որն արդեն մինչև 95 տոկոս լցված է:  Այնտեղ տարեկան մինչև 18 միլիոն խորանարդ մետր նյութ է լցվում, և ծավալները գնալով մեծանում են: Այս ծրագրի շրջանակներում առաջին փուլով ենթադրվում է մինչև 330 միլիոնի ներդրում, ինչի արդյունքում հնարավոր կլինի 12.5 միլիոն խորանարդ մետր նյութ վերցնել այդ պոչամբարներից և կառուցված գործարանում վերամշակել ու ունենալ մի քանի տեսակի արտադրանք, այդ թվում՝ մետաղական խտանյութի տեսքով և ոչ մետաղական տարբեր նյութերի տեսքով, որոնք հնարավորություն են տալիս նաև կազմակերպել արտադրություններ կոմպոզիցիոն նյութերի տեսքով»,- նշեց Գալստյանը:

Ծրագրի առաջին փուլը նախատեսված է իրականացնել 2015-2018թթ.-ը,  երկրորդ փուլը՝ 2019-2025թթ-ը, եթե առաջին փուլը հաջողվի: Առաջինի դեպքում կստեղծվի մոտ 1.500 աշխատատեղ,  երկրորդ փուլն իրագործելու դեպքում՝ շուրջ 6000: Հավելենք, որ «Զանգեզուրի պղնձամոլիբդենային կոմբինատ» ՓԲԸ-ին պատկանող պոչամբարներում կուտակված արտադրական լցակույտերի վերամշակման առաքելությունը ստանձնել է «Ալյոտիգ» ՍՊԸ-ն:

Մանրամասները՝  տեսանյութերում: