Ռոնալդուի հեթ-տրիկի շնորհիվ Պորտուգալիան հաղթեց Հայաստանին (տեսանյութ)

Վազգեն Սարգսյանի անվան «Հանրապետական» մարզադաշտում կայացավ Եվրոպայի 2016 թվականի առաջնության որակավորման փուլի` Հայաստան-Պորտուգալիա հանդիպումը:

Հանդիպման հաշիվը բացվեց 14-րդ րոպեին. Հայաստանի ազգային հավաքականի կազմում աչքի ընկավ Մարկոս Պիզելին: Նախքան ընդմիջման գնալը Ֆերնանդու Սանտուշի սաներին հաջողվեց վերականգնել հաշվի հավասարությունը. 29-րդ րոպեին Կրիշտիանու Ռոնալդուն դիպուկ իրացրեց Ժոաու Մոուտինյուի վաստակած 11-մետրանոց հարվածը: Առաջին խաղակեսում հաշվի մեջ նոր փոփոխություններ չարձանագրվեցին, սակայն խաղակեսը հետաքրքրացրեց խաղադաշտ ներխուժած երկրպագուներից մեկը, ում երկար վազվզոցից հետո անվտանգության աշխատակիցները դուրս բերեցին խաղադաշտից:

Երկրորդ խաղակեսի մեկնարկում հյուրերը բավականին ակտիվ էին, ինչի արդյունքում կարողացան հաշիվը դարձնել 1:3. 55-րդ և 58-րդ րոպեին պորտուգալացիների կազմում կրկին աչքի ընկավ առաջատար Կրիշտիանու Ռոնալդուն: Հանդիպման մնացած ժամանակատվածում մեր ընտրանուն հաջողվեց միայն կրճատել հաշվի տարբերությունը. 72-րդ րոպեին վերջնական հաշիվը ձևակերպեց Հրայր Մկոյանը:

Այս հանդիպումից հետո Պորտուգալիայի հավաքականն ունի 12 միավոր և զբաղեցնում է I խմբի մրցաշարային աղյուսակի առաջին հորիզոնականը, իսկ Հայաստանի ընտրանին վերջին տեղում է` ակտիվում ունենալով ընդամենը մեկ միավոր:

Եվրո-2016, ընտրական փուլ, I խումբ

Հայաստան – Պորտուգալիա`2:3
Գոլերը` Պիզելի 14՛, Մկոյան 72՛ – Ռոնալդու 29՛, 55՛, 58՛