Քիշնեւի քաղաքապետը կընտրվի երկրորդ փուլում

Քիշնեւի քաղաքապետը կընտրվի տեղական ընտրությունների երկրորդ փուլում, քանի որ առաջին փուլում թեկնածուներից ոչ մեկը չի հավաքել ձայների ավելի քան 50 տոկոսը, տեղեկացնում Է «Արմենպրես»-ը:

Քվեարկության նախնական արդյունքների համաձայն՝ սոցիալիստների կուսակցության ներկայացուցիչ Զինաիդա Գրեչանան հավաքել է ձայների 38 տոկոսը, իսկ նրա ընդդիմախոսը՝ Քիշնեւի գործող քաղաքապետ, Լիբերալ կուսակցության փոխնախագահ Դորին Կիրտոակեն՝ 36 տոկոսը:

Օրենսդրության համաձայն՝ երկրորդ փուլը պետք է տեղի ունենա քվեարկությունից երեք շաբաթ անց, այսինքն՝ հունիսի 28-ին:

Մոլդովայում հունիսի 14-ին անցկացվել են իշխանության տեղական մարմինների ընտրություններ: ԿԸՀ-ի տվյալներով՝ քվեարկությանը մասնակցել է մեկ միլիոն 384 հազար 641 մարդ՝ ընտրացուցակներում ներառված 2,8 մլն ընտրողներից: Ընտրություններին մասնակցությունը կազմել է 48,9 տոկոս, ընտրական մրցարշավին մասնակցել է շրջանների, քաղաքների ու գյուղերի ղեկավարների 898 թեկնածու եւ տեղական մակարդակների պատգամավորների 11,6 հազար հավակնորդ, հաղորդել է ՌԻԱ Նովոստին: