Գերմանական կուսակցության առաջնորդը ձերբակալվել է Էրդողանին վիրավորելու համար

Գերմանիայի Դաշնային Հանրապետության իշխանությունները Բեռլինում դատական գործ են հարուցել Գերմանիայի ցանցահենների կուսակցության առաջնորդ Բրունո Կրամի դեմ այն բանի համար, որ նա Բեռլինում Թուրքիայի դեսպանատան առաջ հրապարակորեն ընթերցել է Յան Բյոհմերմանի բանաստեղծությունը, որում վիրավորական արտահայտություներ կան Թուրքիայի նախագահ Ռեջեփ Թայիփ Էրդողանի հասցեին:

Ինչպես հաղորդում է «Արմենպրես»-ը` վկայակոչելով գերմանական Berliner Morgenpost թերթը, կուսակցությունը ապրիլի 22-ին Բեռլինում թուրքական դեսպանատան դիմաց խոսքի եւ մամուլի ազատության համար ցույց էր կազմակերպել, որին մասնակցել են մեծ թվով մարդիկ: Կրամն ընթերցել է Յան Բյոհմերմանի բանաստեղծության` «Էրդողանը քերթում է քրդերին եւ քրիստոնյաներին» հատվածը:

Կրամի ելույթի ժամանակ ոստիկանությունը նրանից խլել է խոսափողը եւ ձերբակալել: Նրա նկատմամբ Գերմանիայի ՔՕԳ 103-րդ` «Արտասահմանյան պետությունների մարմինների եւ ներկայացուցիչների վիրավորել» հոդվածով քրեական գործ է հարուցվել, որով նախատեսվում է դրամական տուգանք կամ մինչեւ երեք տարի ազատազրկում: Նման դատական գործ է բացվել նաեւ Յան Բյոհմերմանի դեմ:

Հեռուստահաղորդավար եւ երգիծաբան Յան Բյոհերմանը գերմանական ZDF հեռուստաալիքի Neo Magazin Royale երգիծական հաղորդման ժամանակ Թայիփ Էրդողանին ուղղված բանաստեղծություն է ընթերցել:

Բանաստեղծությունում թուրքական նախագահը մեղադրվում է ոչ ավանդական սեռական ուղղվածություն ունենալու, ինչպես նաեւ ազգային փոքրամասնությունների եւ ընդդիմության դեմ հանցագործությունների մեջ: Հեռուստահաղորդավարն իր այդ ստեղծագործությունը ներկայացրել էր որպես «զրպարտական վիրավորանքի նմուշ»:

Դրան ի պատասխան Թուրքիայի կառավարությունը բանավոր նոտա էր հղելԲեռլին` պահանջելով քրեական հետապնդում սկսել հեռուստահաղորդավարի նկատմամբ, ով, իբր, վիրավորել է Էրդողանին: Ինքը` Թուրքիայի նախագահը ապրիլի 11-ին մասնավոր կարգով հայտարարությամբ դիմել էր գերմանական Մայնց քաղաքի դատախազություն:

Հետաքրքիր է, որ The Spectator շաբաթաթերթի հոդվածագիր Դուգլաս Մուրեյը Մեծ Բրիտանիայում Թուրքիայի նախագահ Թայիփ Էրդողանին վիրավորող 5- տողանոց բանաստեղծությունների մրցույթ է հայտարարել: BBC-ի թուրքական ծառայությունը հայտնում է, որ մրցույթի հայտարարումը Գերմանիայի վարչապետ Անգելա Մերկելի կողմից գերմանացի երգիծաբան Յան Բյոհերմանի նկատմամբ դատական գործընթաց սկսելու թույլտվության դեմ յուրահատուկ բողոքի ակցիա է:

Անգլիական թերթի հոդվածագիրը հայտնել է նաեւ այն էլեկտրոնային հասցեն (theeditor@spectator.co.uk), որով մրցույթին մասնակցել ցանկացողները կարող են ուղարկել իրենց բանաստեղծությունները:

Բյոհերմանը հայտնել է, որ մրցույթի արդյունքները հրապարակվելու են մինչեւ հունիսի 23-ը` Եվրամիության կազմից դուրս գալ-չգալու հարցով Մեծ Բրիտանիայում հանրաքվե անցկացվելու օրը:

Թուրքիայի 45 գրողներ, ակադեմիկոսներ, լրագրողներ, ակտվիստներ եւ արվեստաբաններ կոչ են արել երկրի Քրեական օրենսգրքից հանել «նախագահին վիրավորանք» 299-րդ հոդվածը, որով մինչեւ 4 տարի ժամկետով ազատազրկում է նախատեսվում:

«Մենք՝ ներքոստորագրյալներս, նկատի առնելով Սահմանադրական դատարանի Մարդու իրավունքների եվրոպական դատարանի որոշումները, Վենետիկի հանձնաժողովի սկզբունքները եւ Սահմանադրության 90/5 հոդվածը, պահանջում ենք չեղարկել իրավունքին հակասող ՔՕԳ 299-րդ հոդվածը, ապահովել օրենքի գերակայությունը, նախագահի համբերությունը վեր դասել քննադատութունից եւ բավարարվել բոլոր հայրենակիցների պահպանությունն ապահովող օրենքի ուժով», -ասվում է թուրք մտավորականների կոչում: