Մեկնարկել է «Ավրորա» մրցանակաբաշխությունը. էկրանին ցուցադրվել են ապրիլյան պատերազմին զոհված տղաների նկարները. ՈՒՂԻՂ

Երևանում մեկնարկել է «Ավրորա» մրցանակի հանձնման արարողությունը, որին մասնակցում է ՀՀ նախագահ Սերժ Սարգսյանը: Մեկնարկը տրվել է  Ռուդոլֆ Խառատյանի «Զույգ արեգակներ» բալետի հատվածով, որը հիմնված է Գրիգոր Նարեկացու մարդասիրական գաղափարախոսության վրա: Իսկ  State Youth Orchestra of Armenia SYOA-ի կատարման ժամանակ էկրանին ցուցադրվել են  Ղարաբաղյան հակամարտության վերջին սրացումների արդյունքում զոհված զինվորների նկարները։

Բուն մրցանակաբաշխությանն անցնելով հիշեցնենք, որ հաղթողին  անդրանիկ «Ավրորա» մրցանակը կհանձնի Ընտրող հանձնաժողովի համանախագահ, ճանաչված դերասան Ջորջ Քլունին: Մրցանակին արժանանալու է մերօրյա այն հերոսը, որն օգնում է մարդկանց՝ անձնվիրաբար եւ բացառիկ ջանքերով: «Ավրորան» շնորհվում է Հայոց ցեղասպանությունը վերապրածների անունից եւ ի երախտագիտություն նրանց, ովքեր փրկության ձեռք մեկնեցին հայ ժողովրդին: 

Մրցանակի չորս հավակնորդներն են Մարգարիտ Բարանկիցեն՝ Բուրունդիից, Թոմ Քաթինան՝ Սուդանից, Սայիդա Ղուլամ Ֆաթիման՝ Պակիստանից, և Հայր Բերնարդ Կինվին՝ Կենտրոնական Աֆրիկայի Հանրապետությունից: Մրցանակի դափնեկիրը ստանալու է հարյուր հազար ԱՄՆ դոլարի պարգեւ եւ նվիրատվության շղթան շարունակելու հնարավորություն` 1 միլիոն ԱՄՆ դոլարի դրամաշնորհի ներկայացնելով իրեն ոգեշնչած մարդասիրական կազմակերպություններին։

The Aurora Prize for Awakening Humanity/«Ավրորա» մրցանակը 100 LIVES նախաձեռնության համահիմնադիրներ Վարդան Գրեգորյանի, Նուբար Աֆեյանի եւ Ռուբեն Վարդանյանի մարդասիրական ձեռնարկն է։ Հիմնադիրները փորձում են ձեւավորել մարդասիրական համաշխարհային նոր շարժում։ 

Մրցանակաբաշխության ընթացքում կշնորհվի նաեւ «Սկզբունքային լրագրություն» խրախուսական մրցանակը, որը սահմանվել է Ժուռնալիստների միջազգային կենտրոնի (ICFJ) եւ 100 LIVES նախաձեռնության կողմից եւ կոչված է ճանաչման արժանացնելու այն խիզախությունը, նվիրվածությունն ու ազդեցությունը, որոնք լրագրողը ցուցաբերել է հումանիտար ծայրահեղ ճգնաժամային իրավիճակում գտնվող վայրերից լրատվություն տրամադրելիս: