Քաղաքակիրթ աշխարհում պատերազմի միջոցով խնդիրներ չեն լուծվում. Էդվարդ Նալբանդյան (տեսանյութ)

Այսօր Հայաստանի Հանրապետական կուսակցության կենտրոնական գրասենյակում տեղի է ունեցել Եվրոպայի ժողովրդական կուսակցության 40-ամյակին նվիրված ընդունելություն, որին  հրավիրված էին  ՀՀ-ում Եվրամիության պատվիրակության ղեկավար Պյոտր Սվիտալսկին, ԵՄ անդամ  երկրների դեսպաններ, ՀՀ կառավարության անդամներ, Ազգային ժողովի պատգամավորներ, ԵԺԿ անդամ այլ կուսակցություններ, հյուրեր: Միջոցառմանը մասնակցում էր նաև ՀՀ ԱԳ նախարար Էդվարդ Նալբանդյանը:

«Կարծում եմ` հեռավոր 1976 թվականին կուսակցության համահիմնադիր և առաջին նախագահ Լեո Թինդեմանսը դժվար թե պատկերացներ, որ իր և իր համախոհների ստեղծած կուսակցությունը կդառնա Եվրոպայի ամենամեծ քաղաքական ընտանիքը` տասնամյակներ շարունակ լինելով մայրցամաքի առաջընթացի շարժիչ ուժերից և բարեփոխումների ջատագովներից ու իրականացնողներից մեկը, եվրոպական մի շարք երկրների քաղաքական վերնախավի կարևոր դերակատարը: Անցած տասնամյակները լի էին ձեռքբերումներով, որոնցից գլխավորը, կարծում եմ, այսօրվա միասնական, խաղաղ ու բարեկեցիկ Եվրոպան է: Եվրոպան, որը չնայած գոյություն ունեցող բազմաթիվ մարտահրավերների, խնդիրների, շարունակում է մնալ ժողովրդավարության, հիմնարար իրավունքների պաշտպանության փարոս»,-նկատեց նախարար Նալբանդյանը՝ հիշեցնելով, որ ԵԺԿ քաղաքական ընտանիքի մաս են կազմում Հանրապետական, «Ժառանգություն» և «Հայկական վերածնունդ» կուսակցությունները, ինչը մի կողմից պայմանավորված է մեր երկրի պատմությամբ և մշակույթով, որոնք, անկասկած, Եվրոպայի անքակտելի մասն են կազմում, մյուս կողմից՝ Հայաստանի ակնկալիքներով` բոլոր հնարավոր ոլորտներում և ուղղություններով զարգացնել ու խորացնել եվրոպական կառույցների և արժեհամակարգի կրողների հետ համապարփակ համագործակցությունը` պատշաճ կերպով հաշվի առնելով այլ ձևաչափերում մեր հանձնառությունները:

«Այս առումով ուրախ եմ նշել, որ Եվրոպական միության հետ հարաբերություններում մենք հասել ենք հերթական պատասխանատու և կարևոր հանգրվանին: Անցյալ տարվա դեկտեմբերին ազդարարվեց Հայաստանի և Եվրոպական միության միջև հարաբերությունների նոր իրավական հիմքի շուրջ բանակցությունների պաշտոնական մեկնարկը: Այն կարտացոլի մեր հարաբերությունների խորությունն ու էությունը, կուրվագծի փոխշահավետ համագործակցության նոր ուղեցույցները, հնարավորություն կտա մեր հարաբերությունների նոր և ամուր իրավական հիմք ձևավորել։ Եվրոպական միության հետ մեր հարաբերություններին անդրադառնալիս առանձնահատուկ պետք է նշել այն կարևոր աջակցությունը, որ տարիներ շարունակ ցուցաբերվել է Հայաստանում իրականացվող բարեփոխումներին, ժողովրդավարության ու օրենքի գերակայության ամրապնդմանը, սոցիալ-տնտեսական առաջընթացին, ինստիտուցիոնալ զարգացմանը: Եվրոպական միության հետ մեր հարաբերությունները կառուցելիս մենք մշտապես զգացել ենք Եվրոպական ժողովրդական կուսակցության աջակցությունը: Համոզված ենք, որ նոր համապարփակ համագործակցության համաձայնագրի մշակման գործընթացում ԵԺԿ-ն կշարունակի գտնվել մեր կողքին»,-նկատեց նախարարը՝ բարձր գնահատելով Հայաստանին վերաբերող հարցերի նկատմամբ ԵԺԿ-ի դիրքորոշումը խորհրդարանական ձևաչափերում: Խոսքը մասնավորապես վերաբերում է Եվրոպական խորհրդարանի, ինչպես նաև ԵԺԿ քաղաքական համաժողովի կողմից Հայոց ցեղասպանության 100-րդ տարելիցին նվիրված բանաձևերի ընդունմանը: Էդվարդ Նալբանդյանն արժանահիշատակ է համարում նաև Եվրոպականն խորհրդարանի՝ «Մարդու իրավունքների և ժողովրդավարության վերաբերյալ» 2013թ. տարեկան զեկույցը, որտեղ կոչ արվեց ԵՄ բոլոր անդամ պետություններին ընդունել Հայոց ցեղասպանությունը և նպաստել այդ հանցագործության ճանաչմանը:

«Եվրոպայի հիմնադիր հայրերից Ռոբերտ Շումանը դեռ 1950 թվականին, առաջ քաշելով իր միասնական Եվրոպայի գաղափարները, ասում էր, որ իր գլխավոր նպատակն է «պատերազմը դարձնել ոչ միայն աներևակայելի, այլև բացարձակապես անհնարին»: Եվրոպային շատ բարդ ճանապարհով, բայց ի վերջո հաջողվեց կյանքի կոչել այդ գաղափարը: Վստահ եմ՝ այստեղ բոլոր հավաքվածները կիսում են մեր ցանկությունն առ այն, որ նաև մեր ողջ տարածաշրջանի համար այդ գաղափարը տեսլական դառնա, և որ Հարավային Կովկասում բոլորն ի վերջո հասնեն այն գիտակցությանը, որ քաղաքակիրթ աշխարհում պատերազմի միջոցով խնդիրներ չեն լուծվում, և անհանդուրժողականության ու այլատյացության քաղաքականությունը մի ուղի է, որը տանում է միայն ու միայն դեպի փակուղի»,-եզրափակեց Էդվարդ Նալբանդյանը: