Պ.Հայրիկյանին այսօր կտեղափոխեն պալատ. Նա դեռ չի դիմել ՍԴ

Հայաստանի նախագահի թեկնածու Պարույր Հայրիկյանը, որի նկատմամբ հունվարի 31-ին մահափորձ էր իրականացվել, դեռ չի դիմել Սահմանադրական դատարան: Այդ մասին Panorama.am-ի թղթակցի հետ զրույցում տեղեկացրեց Հայրիկյանի նախընտրական շտաբի ղեկավար Մանյա Այվազյանը:

«Ես չեմ կարող ասել, թե պարոն Հայրիկյանը երբ հայտարարություն կանի, մենք վաղը ասուլիս ենք տալու այդ ժամանակ ամեն ինչ պարզ կլինի: Ես կարող եմ ասել միայն, որ եթե այսօր պարոն Հայրիկյանը չդիմեց Սահմանադրական դատարան, ուրեմն էլ չենք դիմի», -հավելեց տիկին Այվազյանը:

Նախընտրական շտաբի պետը սակայն, հստակ չասաց, թե Հայրիկյանը մտադրություն ունի՞ դիմել Սահմանադրական դատարան, թե՞ ոչ: «Այդ մասին հայտնի կդառնա ավելի ուշ»,-փոխանցեց նա:

Ինչպես փոխանցում է «Արմենպրես» գործակալությունը, Պարույր Հայրիկյանն առաջիկա մեկ-երկու ժամվա ընթացքում վերակերդանացման բաշանմունքից կտեղափոխվի հիվանդասենյակ: Այդ մասին տեղեկացրել է «Սուրբ Գրիգոր Լուսավորիչ» բժշկական կենտրոնի վերակենդանացման բաժանմունքի վարիչ Լեւոն Օռլովը:

«Վիրահատությունից հետո երրորդ օրն է, վիճակը բավարար է: Այսօր մեր բաժանմունքից դուրս կգրվի և կգնա պալատ»,- հայտնել է Օռլովը՝ հավելելով, որ վերքը չի բորբոքվել, ջերմություն չունի, ճնշումը կայուն է: 

Հիշեցնենք, որ հունվարի 31-ին, ժամը 23.30-ի Տպագրիչների փողոցի թիվ 9 շենքի բակում անհայտ անձը հրազենից կրակ էր արձակել ՀՀ նախագահի թեկնածու Պարույր Հայրիկյանի վրա’ աջ անրակի շրջանում պատճառելով հրազենային վնասվածք: Պ. Հայրիկյանը տեղափոխվել է «Սուրբ Գրիգոր Լուսավորիչ» բժշկական կենտրոն:

Փաստի առթիվ հարուցվել է քրեական գործ ՀՀ քրեական օրենսգրքի 34-305 հոդվածի հատկանիշներով (պետական, քաղաքական կամ հասարակական գործչի սպանության փորձ): Ստեղծվել է համատեղ օպերատիվ-քննչական խումբ, որում ընդգրկվել են ՀՀ ոստիկանության և ԱԱԾ աշխատակիցներ: Դեպքի վայրի զննությամբ հայտնաբերվել է 7.62 մմ տրամաչափի 1 գնդակ:

Նշանակվել են համալիր փորձաքննություններ: Ձեռնարկվում են անհրաժեշտ օպերատիվ-հետախուզական և քննչական միջոցառումներ հանցագործություն կատարած անձի ինքնությունը պարզելու և նրան հայտնաբերելու ուղղությամբ: Քննությունը վարում է ՀՀ ԱԱԾ քննչական վարչությունը: