ԱՎԾ. Հայաստանում ծնելիությունը նվազել է

2012թ. հունվարի 1-ի դրությամբ Հայաստանի մշտական բնակչության թվաքանակի ցուցանիշը, ընթացիկ հաշվառմամբ (2011թ. մարդահամարի հիմքով վարվող), կազմել է 3 021.4 հազ. մարդ, այդ թվում քաղաքայինը՝ 1 912.7 հազ. մարդ և գյուղականը՝ 1 108.7 հազ. մարդ, իսկ 2013թ. հունվարի 1-ի դրությամբ, համապատասխանաբար՝ 3 041.0 հազար, 1 925.4 և 1 115.6 հազ. մարդ:

ՀՀ ազգային վիճակագրական ծառայության տվյալներով՝ ՀՀ մշտական բնակչության թվաքանակի 2012թ. ցուցանիշը վերահաշվարկվել է՝ ըստ ՀՀ 2011թ. մարդահամարի արդյունքների և սկսած 2013թ.-ից ժողովրդագրական ցուցանիշների ընթացիկ հաշվառումն իրականացվում է այդ հիմքով:

2012թ. հունվար-դեկտեմբերին արձանագրվել է 42 333 ծնված (22 715-ը՝ տղա, 19 618-ը՝ աղջիկ), որը 2011թ. նույն ժամանակաշրջանի համեմատ նվազել է 2.3%-ով, իսկ ծնելիության ընդհանուր գործակիցը, 1 000 բնակչի հաշվով նվազել է, համապատասխանաբար՝ 0.4 պրոմիլային կետով և կազմել՝ 14%: Նշենք, որ մայրաքաղաքում ծնունդների թիվը կազմել է 15 552, ամենաբարձր ցուցանիշը գրանցվել է Արարատում՝ 3 740 ծնունդ:

Ինչ վերաբերում է ամուսնալուծությունների թվաքանակին, ապա անցյալ տարվա 19 063 ամուսնության դիմաց ամուսնալուծության 3250 դեպք է գրանցվել։ Թե ամուսնությունների, թե ամուսնալուծությունների բացարձակ թվերի առումով առաջին տեղում Երևանն է (7118 ամուսնություն, 1479 ամուսնալուծություն): 2012թ-ին ամենաշատ ամուսնություն գրանցվել է Արմավիրի մարզում՝ 1725, իսկ ամուսնալուծության ամենաբարձր ցուցանիշը գրանցվել է Լոռիում՝ 427 դեպք:

2012թ. հունվար-դեկտեմբերին արձանագրվել է մահացության 27 514 դեպք: 2011թ. համեմատ մահվան դեպքերն նվազել են 1.6 %-ով, իսկ մահացության ընդհանուր գործակիցը նվազել է 0.2 պրոմիլային կետով:

Ըստ ԱՎԾ-ի՝ 2012թ. հունվար-դեկտեմբերին ծնվածների թվաքանակը 1.5 անգամ գերազանցել է մահացության դեպքերը: Բնական հավելաճի գործակիցը, 1 000 բնակչի հաշվով, 2012թ. հունվար-դեկտեմբերին կազմել է 4.9‰, 2011թ. հունվար-դեկտեմբերի 5.1%-ի համեմատ: