Որտե՞ղ են քվեարկելու ՀՀ նախագահի թեկնածուները

ՀՀ նախագահի թեկնածու Հրանտ Բագրատյանն այսօր քվեարկություն է կատարելու մայրաքաղաքի Ավետ Ավետիսյան փողոցի Մուշեղ Գալշոյանի անվան համար 148 դպրոցում տեղակայված ընտրական տեղամասում:

Պարույր Հայրիկյանն իր ընտրությունը կկատարի Կոտայքի մարզի Գողթ գյուղի միջնակարգ դպրոցում:

«Ժառանգության» նախագահ, ՀՀ նախագահի թեկնածու Րաֆֆի Հովհաննիսյանը և իր ընտանիքի անդամների հետ կքվեարկեն Նորք Մարաշի 157 դպրոցի ընտրական տեղամասում:

ՀՀ նախագահի թեկնածու, 29–րդ օրը հացադուլի մեջ գտնվող Անդրիաս Ղուկասյանը հայտարարել է, որ ֆիզիկապես ի վիճակի չէ ընտրատեղամաս գնալու:

ՀՀ նախագահի թեկնածու Արման Մելիքյանը նույնպես քարոզարշավի ընթացքում հայտնել էր, որ քվեարկության չի գնա՝ նախապես չճանաչելով ընտրությունների արդյունքները:

Էպոսագետ, ՀՀ նախագահի թեկնածու Վարդան Սեդրակյանը կքվեարկի Քանաքեռի երաժշտական դպրոցում:

ՀՀ գործող նախագահ, նախագահի թեկնածու Սերժ Սարգսյանը ընտրություն կկատարի Սուրեն Սպանդարյանի անվան միջնակարգ դպրոցում տեղակայված ընտրատեղամասում:

Նշենք, որ փետրվարի 8-ին իր թեկնածությունը հանած Արամ Հարությունյանը այսօր ընտրության չի գնա։ Ի դեպ, այսօր նրա ծննդյան օրն է:

Tert.am-ը այս տեղեկությունները ստացավ ՀՀ նախագահի թեկնածուներից, նրանց նախընտրական շտաբներից: