ՍԴՀԿ ատենապետ. Սիրիահայությանը Հայաստանն արժանի ընդունելություն է ցուցաբերել
Նմանատիպ
Վարչապետ Տիգրան Սարգսյանն ընդունել է Սոցիալ Դեմոկրատ Հնչակյան կուսակցության Կեդրոնական Վարչության ատենապետ Սեդրակ Աճեմյանին, Վարչության անդամ Վազգեն Կալթակճյանին և ՍԴՀԿ Հայաստանի վարչության ատենապետ Գևորգ Պերկուպերկյանին: Ինչպես հայտնում են ՀՀ կառավարության տեղեկատվության և հասարակայնության հետ կապերի վարչությունից, զրուցակիցներն անդրադարձել են Հայաստանում կայացած նախագահական ընտրություններին:
Սեդրակ Աճեմյանը, մասնավորապես, նշել է. «Մեր նախորդ հանդիպման ժամանակ Դուք համոզմունք հայտնեցիք, որ Հայաստանում անցկացվելու են ազատ և թափանցիկ նախագահական ընտրություններ: Այսօր կարող ենք նշել, որ Հայաստանի իշխանություններն ունեցան այդ քաղաքական կամքը: Ընտրությունները մի քանի քայլ առաջ էին, ինչի մասին են վկայում միջազգային կառույցների արձագանքը: Շնորհավորում եմ Հանրապետության Նախագահին և Ձեզ՝ այս առաջընթացի համար»:
Սեդրակ Աճեմյանն իր խոսքում նաև ցանկություն է հայտնել առաջիկայում ավելի սերտացնել Հայաստանի իշխանությունների հետ փոխհարաբերությունները, ինչին ի պատասխան վարչապետ Տիգրան Սարգսյանը նշել է. «Ավանդական կուսակցությունները պետք է հզոր լինեն, դա բխում է Հայաստանի և հայ ժողովրդի շահերից»: Անդրադառնալով ընտրություններին՝ վարչապետն ասել է, որ ժողովրդավարական գործընթացների կազմակերպումն իշխանությունների պարտքն է:
Սեդրակ Աճեմյանը նաև շնորհակալություն է հայտնել Հայաստանի կառավարության կողմից սիրիահայերին ցուցաբերած օժանդակության համար’ նշելով, որ սիրիահայությանը Հայաստանն արժանի ընդունելություն է ցուցաբերել:
Հետևեք մեզ նաև Telegram-ում