Րաֆֆի Հովհաննիսյանը կոչ արեց Արագածոտնի մարզպետին հրաժարական տալ

Ինչպես եւ ավելի վաղ տեղեկացրել էր «Ժառանգություն» կուսակցության մամուլի ծառայությունը, «Ժառանգություն» կուսակցության ղեկավար, ՀՀ նախագահական ընտրություններում երկրորդ տեղը գրաված Րաֆֆի Հովհաննիսյանը շարունակում է մարզային իր հանդիպումները: Երեկ նա այցելել էր Տավուշի մարզ, իսկ այսօր հանդիպումներ է ունենում Արագածոտնի մարզի իր համակիրների հետ:
Թալին քաղաքում քաղաքացիների հետ հանդիպման ժամանակ Հովհաննիսյանը հորդորեց Արագածոտնի մարզպետ Սարգիս Սահակյանին հրաժարական տալ, հակառակ դեպքում նա ստիպված կլինի կանգնել դատարանի առաջ: Այս մասին տեղեկացնում է Yerkir.am-ը:

«Պարո’ն Սահակյան, հրաժարական տվեք: Դուք չեք ներկայացնում Թալինի ժողովրդին: Դո՞ւք եք սեփականատերն այս մարզի: Լիսկայի նման պետք է հրաժարական: Եթե’ ոչ, դատարանի առաջ կկանգնեք», մասնավորապես ասել է ընդդիմության առաջնորդը:

Ինչպես տեղեկացնում է Panorama.am-ը, Հովհաննիսյանը նաեւ նշել է, որ պարոն Սահակյանը պետք է հետևի «պարոն Լիսկայի օրինակին», այնուհետ մարզպետին խորհուրդ է տվել ներողություն խնդրել նրա սպառնալիքների, թույլ տված կեղծիքների, ստի համար, այլապես սպառնաց, որ նա դատարանի առաջ կկանգնի:

«100 տոկոս»,-արձագանքեց հանդիպման մասնակիցներից մեկը: