«Անուրանալի է ձեր ներդրումը մեր ձեռքբերումներում». Տ.Մարգարյանը շնորհավորել է կանանց

Երևանի քաղաքապետ Տարոն Մարգարյանը շնորհավորական ուղերձ է հղել Կանանց միջազգային օրվա առթիվ, հաղորդում են Երևանի քաղաքապետարանի մամուլի ծառայությունից: Ուղերձում, մասնավորապես, ասվում է.

«Սիրելի կանայք,

Ջերմորեն շնորհավորում եմ Ձեզ տարվա ամենագեղեցիկ տոնի կապակցությամբ։

Անսահման համբերությամբ ու բարությամբ, անսպառ լավատեսությամբ, հարազատ օջախին ու ընտանիքին ձեր անմնացորդ նվիրումով դուք արժանիորեն վաստակել եք ամենաբարձր գնահատանքը:

Անուրանալի է նաև ձեր ներդրումը մեր ձեռքբերումներում: Նաև ձեր հոգածությամբ, տնտեսության ամենատարբեր ճյուղերում և բնագավառներում ձեր նվիրված աշխատանքով է, որ օր օրի շենանում է մեր սիրելի մայրաքաղաքը։

Ձեր տոնի ու բնության զարթոնքի համընկնումն էլ խորհրդանշական է. գեղեցկության տոնն այլ կերպ չէր կարող լինել։ Ուստի թող գարունով, գարնան բույրով հագեցած լինի ձեր ու ձեր հարազատների յուրաքանչյուր օրը: Քաջառողջություն, անհատնում երջանկություն ու հաջողություններ ձեզ, մեր սիրելի մայրեր, կանայք ու քույրեր»։