ԱԻՆ-ը ուսումնավարժություն է անցկացնում դպրոցում. ինչպես գործել դպրոցում ծագած հրդեհի ժամանակ

Վաղը ժամը 14.00-ին ՀՀ ԱԻ նախարարությունը Երևանի Ս. Գևորգյանի անվան թիվ 189 ավագ դպրոցում կանցկացնի ցուցադրական հատուկ տակտիկական ուսումնավարժություն’ «Դպրոցում ծագած ուժեղ հրդեհի դեպքում աշակերտների տարհանման, հրդեհաշիջման և փրկարարական աշխատանքների կազմակերպումն ու իրականացումը» թեմայով։ Այս մասին տեղեկանում ենք ՀՀ Արտակարգ Իրավիճակների նախարարության պաշտոնական կայքից:

Ըստ աղբյուրի` ուսումնավարժության նպատակներն են.

1. գործնականում ստուգել դպրոցում տեղադրված «ՍՈՍ ՍԻՍԹԵՄՍ» հակահրդեհային ահազանգման ու ազդարարման համակարգի, ինչպես նաև ՔՊ պլաններով նախատեսված տնօրինության և ուսուցչական կազմի կողմից տարհանման գործընթացների իրականացման հմտությունները

2. կատարելագործել հատուկ նշանակության փրկարարական աշխատանքների իրականացման կենտրոնի և հատուկ հրշեջ ջոկատի անձնակազմերի գործնական հմտությունները

3. ներդաշնակ դարձնել արձագանքող ուժերի գործողությունները:

Միջոցառմանը մասնակցում են թիվ 189 ավագ դպրոցի ուսուցչական և աշակերտական կազմը, ՀՀ ԱԻՆ հատուկ նշանակության փրկարարական աշխատանքների իրականացման կենտրոնի 1 մարտական հաշվարկ, շտապօգնության 1 բրիգադ և ՀՀ ոստիկանության հասարակական կարգի պահպանման ծառայության մեկ մարտական հաշվարկ: Մտահղացման համաձայն’ դպրոցի կենտրոնական, երկհարկանի մասնաշենքի 2-րդ հարկի հանդիսությունների դահլիճում հրդեհ է բռնկվել, որը գրավել է շուրջ 100 քմ տարածք, ու տարածվում է դեպի տանիք։ Կա 4 պայմանական տուժած, որոնք ստացել են տարբեր աստիճանի այրվածքներ և այլ վնասվածքներ։ Առկա է հրդեհի տարածման ու ծխապատ գոտու առաջացման վտանգ և անհրաժեշտ է տարհանել տվյալ շենքում գտնվող ուսուցչական կազմին և 1000-ից ավելի աշակերտներին։