Սեխի թուփն ու ընկուզենին

Արևի շողով,
Անձրևի ցողով,
Երբ Սեխը ծաղկեց
Եվ հյութով լցվեց,
Սկսեց ինքը իր գովքը երգել,
Իսկ Ընկուզենուն ծաղրել ծանակել,
Բայց Ընկուզենին համեստ ու խոնարհ
Ասում էր նրան շատ համբերատար․
Ով շատ դիմանա,
Թող նա պարծենա․․․
Աշունը անցավ, եկավ ցուրտ ձմեռ,
Սառույցով ծածկեց դաշտ, հովիտ ու լեռ,
Մեր սեխի թուփը սառեց, փայտացավ,
Իսկ Ընկուզենին դարեր դիմացավ։

Մկրտիչ ԿՈՐՅՈՒՆ

Մկրտիչ Կորյունը ծնվել է 1913 թվականին Ղարսում։ Եղեռնի տարիներին Մկրտիչ Կորյունի ընտանիքը գաղթում է Ղարսից և բնակություն հաստատում Գյումրիում։ 1929 թվականին նա ավարտում է տեղի յոթնամյա դպրոցը։

1932 թվականին հրատարակվում է նրա բանաստեղծությունների առաջին ժողովածուն «Տեմպերի հերոսները» վերնագրով։ Նույն թվականին Կորյունը ընդունվում է Երևանի պետական համալսարանի լեզվագրական բաժինը։ 1937 թվականին ավարտում է համալսարանը և նվիրվում իր սիրած գործին՝ մանկավարժությանն ու մանկական գրականությանը։

Հայրենական պատերազմի ավարտից հետո Կորյունը նոր եռանդով շարունակում է իր գրական գործունեությունը։ 1947 թվականին ՀԳԱ Մանուկ Աբեղյանի անվան ինստիտուտում դիսերտացիա է պաշտպանում «Հասկերը որպես մանկական գրական ամսագիր» թեմայով և ստանում բանասիրական գիտությունների թեկնածուի գիտական աստիճան։