Բակո Սահակյանը ողջունել է «Հայերենն իմ սրտում է» համաժողովի մասնակիցներին
Նմանատիպ
Արցախի Հանրապետության Նախագահ Բակո Սահակյանը ապրիլի 22-ին ուղերձ է հղել Երեւանում մեկնարկած «Հայերենն իմ սրտում է» համահայկական երիտասարդական համաժողովի մասնակիցներին: Այս մասին հայտնում է Արցախի Հանրապետության Նախագահի Աշխատակազմի Տեղեկատվության Գլխավոր Վարչությունից:
Ուղերձում ասված է.
<<Ի սրտե ողջունում եմ «Հայերենն իմ սրտում է» համահայկական համաժողովի բոլոր մասնակիցներին ու հյուրերին:
Նման միջոցառման անցկացումը համարում եմ կարեւոր ու պահանջված, եւ այդ իսկ պատճառով, ուզում եմ երախտագիտություն հայտնել Հայաստանի Հանրապետության Սփյուռքի նախարարությանը’ նախաձեռնության իրականացման համար:
Հայ ժողովրդի գոյության եւ բնականոն զարգացման ամենահուսալի գրավականը հզոր ու անկախ ազգային պետականության առկայությունն է: Իսկ մեր անկախ պետականության հիմքում ընկած է Հայաստան-Արցախ-Սփյուռք կուռ եռամիասնությունը եւ նրա շարունակական ամրապնդումը: Այս համատեքստում հրամայական է դառնում համազգային կարեւորագույն խնդիրների շուրջ միասնական ու համակարգված քաղաքականության իրականացումը: Նման գերխնդիրներից է Հայոց մեծ եղեռնի միջազգային ճանաչումը, Արցախյան հիմնահարցի արդարացի լուծումը եւ սփյուռքում հայ ինքնության պահպանումը:
Ողջունելի է, որ այդ եւ դրանց հետ կապված բազմաթիվ այլ հարցեր ընդգրկված են համաժողովի օրակարգում: Կրկնակի ողջունելի է, որ միջոցառումը երիտասարդական է: Նման մոտեցումը հնարավորություն է տալիս աշխատանքն ավելի երկարաժամկետ տեսլականով կազմակերպելու համար:
Վստահ եմ, որ համաժողովը հաջողությամբ կիրականացնի իր առջեւ դրված խնդիրները եւ կնպաստի աշխարհի տարբեր ծայրերում հայ երիտասարդների միջեւ կապերի ամրապնդման գործին:
Համաժողովի մասնակիցներին մաղթում եմ հաջողություններ եւ արդյունավետ աշխատանք>>:
Հետևեք մեզ նաև Telegram-ում