Նման պահվածք ունեցող Ռուսաստանի վաղուց չեմ հիշում. քաղաքագետը՝ Փաշինյանի վարչապետությանը ՌԴ-ի արձագանքի մասին

ԵՐԵՎԱՆ, 10 ՄԱՅԻՍԻ, Times.am: Քաղաքագետ Ալեքսանդր Իսկանդարյանի համար կանխատեսելի են եղել ԱՄՆ-ի ու ԵՄ-ի արձագանքը՝ ՀՀ վարչապետի պաշտոնում Նիկոլ Փաշինյանի ընտրվելուց հետո, սակայն նույն չէր կարելի ասել Ռուսաստանի արձագանքի պարագայում: Այս մասին քաղաքագետը խոսեց  մամուլի ասուլիսi ժամանակ:

«Անկեղծ ասած, ես այդպիսի ռելևանտ պահվածք ունեցող Ռուսաստանի վաղուց չեմ հիշում: Այդ պահվածքի պատճառները կարող են լինել մի քանիսը: Կարելի է մտածել, որ ռուսները դաս քաղեցին ուկրաինական, վրացական, աբխազական իրադարձություններից, երբ Ռուսաստանը կողմերից մեկի կողքին կանգնեց: Ես կարծում եմ, որ պետք է հաշվի առնել այն, որ Հայաստանում առկա իրավիճակի առաջացումն էականորեն տարբերվում է այլ երկրների նման իրավիճակից: Այստեղ այս ամենը Ռուսաստանի դեմ չէր ուղղված, ինչի մասին Նիկոլ Փաշինյանն ասում էր»,- ասաց նա:

Անդրադառնալով Սոչիում մայիսի 14-ին Եվրասիական բարձրագույն տնտեսական խորհրդի նիստի շրջանակում ՌԴ նախագահ Վլադիմիր Պուտինի հետ Նիկոլ Փաշինյանի հնարավոր հանդիպմանը՝ քաղաքագետը նշեց, որ Նիկոլ Փաշինյանը կփորձի իր դիրքորոշումը ներկայացնել Ռուսաստանի նախագահին, ինչպես անում էր հրապարակներում, հարցազրույցներում: «Սա սովորական հանդիպում չէ: Հայաստանի նոր վարչապետն առաջին անգամ հանդիպում է ՌԴ նախագահի հետ: Կարծում եմ, որ անձնական հարցերի վրա տեղին չէ ուշադրություն դարձնելը, թե որքանով նրանք անձնապես դուր կգան միմյանց և այլն»,- ասաց նա: