Գյուղացիները երկու օր ժամանակ են տվել իշխանություններին
Նմանատիպ
Կարկուտից տուժած գյուղացիներն արդեն մի քանի օր է ինչ ցույցերի միջոցով փորձում են կառավարության ուշադրությունն ուղղել իրենց խնդիրների վրա:
Վերջիններս դիմում են ծայրահեղ քայլերի, փակում կենսական նշանակություն ունեցող մայրուղիները:
Գյուղացիների համար այժմ նշանակություն չունի թե ինչի հետևանքով են կորցրել բերքը: Արդյոք հակակարկտային կայանները աշխատել են թե ոչ, դա արդեն էական նշանակություն ունենալ չի կարող: Միակ պահանջ այն է, որ Կառավարությունն ինչ որ կերպ աջակցի:
Նրանք խնդրում են կամ սառեցնել բանկային հաշիվները, կամ հետաձգել մարման ժամկետները, մի մասն էլ փոխհատուցում է պահանջում:
Այս հարցի շուրջ ՀՀ վարչապետ Տիգրան Սարգսյանն ԱԺ նիստի ժամանակ հայտնեց, որ կառավարությունը տուժած տնտեսվարողներին փոխհատուցում չի տրամադրի, փոխարենը կտրամադրի օգնություն:
Վարչապետի խոսքով` անգամ ամենազարգացած պետությունները չեն կարող նման դեպքերում փոխհատուցում ցուցաբերել:
Ինչ վերաբերվում է բանկերին, ապա վերջիններս իրենց հերթին խոստացել են հաշվի առնել գյուղացիների ֆինանսական վիճակի վատթարացումը և ընդառաջել նրանց:
Ինչպես հայտնում է ԳԱԼԱ-ն, իրենց տրամադրության տակ է հայտնվել մի փաստաթուղթ` ստորագրված ՀՀ գյուղատնտեսության նախարար Սերգո Կարապետյանի կողմից, որով ՀՀ իշխանությունները’ ի դեմս Սերգո Կարապետյանի, իրենց ձեռքն են պարզում եւ օժանդակություն են խնդրում այն քաղաքացիներից, ովքեր ցանկություն ունեն օգնելու եւ հանգանակություն կատարելու փաստաթղթում նշված հաշվեհամարով:
Հանգանակված գումարը, ըստ փաստաթղթի’ գյուղնախարարությունը փոխանցելու է օրերս կարկտահարությունից տուժած տնտեսություններին՝ փոխհատուցելու վնասը:
Աղբյուրը նշում է, որ ըստ երեւույթին, այս փաստաթուղթն ավելի շատ միտված է ազդելու Սփյուռքի մեր հայրենակիցների վրա:
Հիշեցնենք, որ մի քանի օր առաջ տեղացած ուժեղ կարկուտը ավերել է Արմավիրի մարզի 5-6 գյուղերի տնտեսությունները:
Ցուցարար գյուղացիները երկար բանակցություններից հետո` երկու օր ժամանակ տվեցին ՀՀ իշխանություններին՝ վնասը փոխհատուցելու համար:
Աստղիկ Սահակյան
Հետևեք մեզ նաև Telegram-ում