Երևանի ոստիկանապետը բիզնես չունի՞
Նմանատիպ
«Հրապարակ»-ը զրուցել է Երևանի նորանշանակ ոստիկանապետ Աշոտ Կարապետյանի հետ:
– Պարոն Կարապետյան, Ձեր և Ներսիկ Նազարյանի միջև ի՞նչ տարբերություն կա, և դա հատկապես նշանակվելուց հետո ինչպե՞ս է արտահայտվել:
– Ես գնահատական տվող չեմ, էսօր մենք նշում ենք Տարոն Մարգարյանի երդմնակալության արարողությունը՝ որպես նոր քաղաքապետի:
– Երևանի քաղաքացին Ձեր և նախորդի տարբերությունն ինչպե՞ս է զգալու:
– Մենք նոր ոստիկանի կերպար ենք կերտում, դրա գնահատականը թող տա երևանցին: Տարբերությունը թող քաղաքացին ինքն ասի, ես աշխատում եմ իմ գործառույթների շրջանակում՝ պաշտպան լինելով քաղաքացու շահերին:
– Ներսիկ Նազարյանի պաշտոնանկությունը պաշտոնապես հիմնավորվեց բիզնես գործունեությամբ, ինչի Դուք բիզնես չունե՞ք, որ Ձեզ նշանակեցին իր փոխարեն:
– Ես բիզնես չունեմ:
– Ինչո՞վ եք ապրում, աշխատավարձո՞վ:
– Իհարկե, ոստիկանի պես:
– Ո՞ր ոստիկանի՝ շարքայի՞ն, թե՞ բարձրաստիճան:
– Գնդապետի կոչում ունեցող ոստիկանի պես…
– Բիզնեսներն էլ գրանցել եք ընտանիքի անդամների անունո՞վ…
– Չունեմ ես բիզնես, չեմ էլ պատկերացնում, որ կարող ա ունենամ, բոլոր իմ բարեկամներն ու ծանոթները կվստահեցնեն, որ ես բիզնես չունեմ: Ես չեմ հարգի ինձ, որ բիզնես ունենամ և լինեմ ոստիկան, դրանք անհամատեղելի են՝ իմ կարծիքով:
– Այսինքն, Դուք չեք հարգում այն ոստիկաններին, որոնք բիզնե՞ս ունեն:
– Ես չեմ հարգի ինձ, եթե ունենամ բիզնես:
– Դա նշանակում է, որ Ձեր բիզնեսմեն գործընկերներին էլ չեք հարգում…
– Ոչ, ոչ, դրա մասին չէ խոսքը… Ես կարծում եմ, որ դրանք անձնական խնդիրներ են, և ես ունեմ իմ կարծիքը, եթե դու զինվորական ես, ոստիկան, իրավունք չունես բիզնես ունենաս, կամա թե ակամա դու պետք է գնաս էն ուղղությամբ, որտեղ կարող ես բարեկեցիկ ապրել:
– Գասպարյանը Ձեր առաջընթացը բացատրեց Ձեր երիտասարդ լինելով, դա՞ է Ձեր միակ առավելությունը:
– Ես զբաղեցրել եմ քրեական գլխավոր վարչության պետի պաշտոնը, և իմ պաշտոնն առաջխաղացում չէր: Դա կադրային տեղաշարժ էր:
– Եվ ո՞րն է այդ տեղաշարժի գրավականը:
– Ժողովրդի մեջ հարգանք ձեռք բերելը, ոստիկանության դերի բարձրացման կարևորությունը:
Հարցազրույցն ամբողջությամբ կարդացեք «Հրապարակ»-ի այսօրվա համարում:
Հետևեք մեզ նաև Telegram-ում