3 մլն դրամ կհատկացնեն Կ. Դեմիրճյանի արձանի պատվանդանի կառուցման համար

ԵՐԵՎԱՆ, 7 ՍԵՊՏԵՄԲԵՐԻ, Panorama.am: Երևանի ավագանին սեպտեմբերի 10-ին նախատեսված նիստի օրակարգում ներառել է Երևան քաղաքի 2019 թվականի բյուջեում փոփոխություններ իրականացնելու վերաբերյալ որոշման նախագիծը։

Պաշտոնական էջում հրապարակված նախագծից տեղեկանում ենք, որ փոփոխություններից մեկի համաձայն 3 մլն 281 հազար դրամ է տրամադրվելու քաղաքական և պետական գործիչ, Հայաստանի ազգային հերոս Կարեն Դեմիրճյանի արձանի պատվանդանի կառուցման համար։

Նախատեսվում է արձանը տեղադրել Կարեն Դեմիրճյանի անվան մարզահամերգային համալիրի տարածքում։

Հիշեցնենք, որ դեռևս 1999 թվականի ՀՀ նախագահի հրամանով քաղաքապետարանին հանձնարարվել է Երևանի փողոցներից մեկը կոչել քաղաքական, պետական գործիչ Կարեն Դեմիրճյանի անունով և այնտեղ տեղադրել նրա արձանը: Արդեն մի քանի տարի է Երևան քաղաքի Մ. Մաշտոցի հ.15 և հ.17 շենքերի միջանկյալ հատվածում գտնվող այգու, Մ.Մաշտոցի պողոտայի հարակից հատվածում տեղադրված է մի քար, որի վրա գրված է՝ «Այստեղ տեղադրվելու է ազգային հերոս Կարեն Դեմիրճյանի հուշարձանը»:

Այս տարիների ընթացքում մի քանի անգամ մրցույթ է հայտարարվել, սակայն ներկայացված նախագծերից և ոչ մեկը հավանության չի արժանացել: Երևանի քաղաքապետարանը Հայաստանի ազգային հերոս Կարեն Դեմիրճյանի հիշատակը հավերժացնող հուշարձան-կոթողի բաց մրցույթ վերջին անգամ անգամ հայտարարվել է 2012 թվականին: Այնուհետև քաղաքապետարանը պատվիրել քանդակագործ Տիգրան Արզումանյանին ստեղծել Կ.Դեմիրճյանի հուշարձանը: