Համազգայինը մեկնում է Կիպրոս

ԵՐԵՎԱՆ, 6 ՓԵՏՐՎԱՐԻ, Irates.am: Սոս Սարգսյանի անվան համազգային պետական թատրոնը մեկնում է Կիպրոս` մասնակցելու «5 вечеров на кипре» միջազգային չորրորդ փառատոնի: Թատրոնի տնօրեն Արման Նավասարդյանը մեկնելուց առաջ թատերասերներին տեղեկացրեց, թե ինչ է կատարվում թատրոնի նոր շենքում: Կատարվել են ջերմամեկուսացման աշխատանքներ: Շուտով շենքը ծածկ կունենա: Սկսվել են նաև ներսի աշխատանքները:

Հիշեցնենք, որ շենքը կառուցվում է ԵԹԿՊԻ-ի հարևանությամբ գտնվող ֆինանսաբանկային քոլեջ հիմնադրամի վթարային շենքի տեղում: Թատրոնի շենքի ճարտարապետն է Իսահակ Ներսիսյանը: Սոս Սարգսյանի անվան Համազգային թատրոնը հիմնադրվել է 1991-ին, Սոս Սարգսյանի նախաձեռնությամբ: 2003-ին ստացել պետական կարգավիճակ:

Թատրոնը 2019-ին ունեցել 7 նոր ներկայացում մեծ դահլիճում, 8 թատերական ընթերցումներ՝ փոքր դահլիճում: Այս տարի ավելի քիչ պրեմիերաներ են անելու, վայելելու են արդեն ստեղծվածը, ինչը սակայն չի նշանակում, թե նոր ներկայացում չեն ունենալու: Այս մասին դեռևս տարեսկզբին լրագրողների հետ հանդիպման ժամանակ ասել էր թատրոնի գեղարվեստական ղեկավար Նարինե Գրիգորյանը:

Նշենք, որ փետրվարի 16-ին, 23-ին կկայանա Նարինե Գրիգորյանի«Փափլիկը» ներկայացման առաջնախաղը ` բեմադրված Գի Դը Մոպասանի «Ճարպագունդը» ստեղծագործության հիման վրա, փետրվարի 22-ին` Ֆլորիան Զելլեր «Սուտ» պիեսի առաջնախաղը` Սաթէ Խաչատրյանի բեմադրությամբ:

Արմինե ՍԱՐԳՍՅԱՆ