Մահացել է հուշարձանագետ Սամվել Կարապետյանը

ԵՐԵՎԱՆ, 27 ՓԵՏՐՎԱՐԻ, Panorama.am։  Մահացել է հայ անվանի հուշարձանագետ, պատմաբան, բանահավաք, Հայկական ճարտարապետությունն ուսումնասիրող հիմնադրամի (ՀՃՈւՀ) երևանյան գրասենյակի նախագահ Սամվել Կարապետյանը: Այս մասին տեղեկանում ենք զբոսաշրջության մասնագետ, հեթանոս Վահե Լորենցի ֆեյսբուքյան էջից։

Սամվել Կարապետյանը ծնվել է 1961 թ. հուլիսի 30-ին։

Արմատներով Արճեշ գավառի Բերդաղ գյուղից է։

1978 թ. ավարտել է Երևանի Միսաք Մանուշյանի անվան թիվ 48 դպրոցը։

Սկսած 1975 թվականից՝ ճամփորդել է Հայկական ԽՍՀ տարածքով բնությունը ուսումնասիրելու նպատակով, իսկ 1978 թվականից սկսած լուսանկարում, չափում և նկարագրում է հայկական հուշարձանները ամբողջ Պատմական Հայաստանի տարածքով։ Երեք տասնամյակի ընթացքում հետազոտում և ցուցակագրում է Պատմական Հայաստանի հայ ճարտարապետության հազարավոր նմուշներ։

Կարապետյանը հայտնի էր որպես հարևան պետություններում հայկական հուշարձանների նկատմամբ վերաբերմունքի քննադատ։

Նա 2007 թ. ԱՄՆ կոնգրեսին և 2008 թ. Մարդու իրավունքների Եվրոպական դատարանին է ներկայացրել իր փաստերը, որ Թուրքիայի, Ադրբեջանի, Վրաստանի իշխանությունները նպատակաուղղված կերպով իրականացնում են հայկական հուշարձանների ոչնչացման քաղաքականություն։

Կարապետյանը 2007 թվականին արժանացել է Հայաստանի Հանրապետության նախագահի մրցանակին՝ հումանիտար գիտություններում ունեցած ներդրումների համար, 2004-ին Արցախի Հանրապետության Մեսրոպ Մաշտոց շքանշանին և Արցախի Հանրապետության Եղիշեի անվան գրականության մրցանակին: