Հակոբ Արշակյանը 8 ամսում ստացել է մոտ 21.000 ԱՄՆ դոլար պարգևավճար

Հակոբ Արշակյանը 8 ամսում ստացել է մոտ 21.000 ԱՄՆ դոլար պարգևավճար

ԵՐԵՎԱՆ, 28 ՓԵՏՐՎԱՐԻ, Analitik.amՀՀ Բարձր տեխնոլոգիական արդյունաբերության նախարար Հակոբ Արշակյանը 2019 թվականի մայիս ամսից մինչև տարեվերջ ստացել է 10 միլիոն 159 104 ՀՀ դրամ պարգևավճար՝ մոտ 21 000 ԱՄՆ դոլար։ Այս մասին ի պատասխան Analitik.am-ի հարցմանը, հայտնեցին ՀՀ Բարձր տեխնոլոգիական արդյունաբերության նախարարությունից։

Հակոբ Արշակյանի ամսական աշխատավարձը կազմում է 793 680 ՀՀ դրամ, որի հետ միասին 2019 թվականի մայիսից ամեն ամիս նա ստացել է նաև 1 269 888 ՀՀ դրամ պարգևավճար։

ՀՀ Բարձր տեխնոլոգիական արդյունաբերության փոխնախարարներ Գոռ Մելիքյանի և Արմեն Աբրոյանի ամսական աշխատավարձը կազմում է 562 190 ՀՀ դրամ։ 2019 թվականի մայիսից սկսած նրանք նույնպես յուրաքանչյուր ամիս ստացել են պարգևավճար՝ 899 504 ՀՀ դրամի չափով։ 8 ամսում յուրաքանչյուրը ստացել է 7 միլիոն 196 032 ՀՀ դրամ պարգևավճար՝ մոտ 15 000 ԱՄՆ դոլար։

2019 թվականին ՀՀ բարձր տեխնոլոգիական արդյունաբերության նախարարության ՀՀ պարգևատրման ֆոնդը կազմել է 100 միլիոն 391 800 ՀՀ դրամ։ Նախարարությունից նշել են, որ պարգևատրվել են բոլոր աշխատակիցները։

Նշվում է նաև, որ նախարարի և փոխնախարարի աշխատավարձի դրույքաչափը 2019 թվականին չի ավելացել, վերջիններս վարձատրվել են օրենքով սահմանված դրույքաչափով։

Հիշեցնենք, որ պետական պաշտոններ զբաղեցնող անձանց եկամուտների մասին տեղեկությունները չեն կարող համարվել անձնական և գաղտնի պահվել, հետևաբար ԶԼՄ-ների կողմից արված հարցումներին պետական մարմիններն օրենքով պարտավորված են տրամադրել մանրամասն տեղեկություններ։

Հետևեք մեզ նաև Telegram-ում