Անգլիայի առաջնությունը կարող է դադարեցվել

ԵՐԵՎԱՆ, 28 ՓԵՏՐՎԱՐԻ, ArmSport.am: «Լիվերպուլը» կարող է չստանալ ԱՊԼ-ի չեմպիոնական տիտղոսը, եթե Անգլիայի առաջնության ընթացիկ մրցաշրջանը դադարեցվի կորոնավիրուսի տարածման պատճառով: Այս մասին հայտնում է The Telegraph-ը:

Աղբյուրի փոխանցմամբ, համաճարակի արագ տարածումը բարձրացրել է հավանականությունն այն բանի, որ կառավարությունը հրաման կստորագրի մոտ երկու ամսով մարզական բոլոր միջոցառումների չեղարկման վերաբերյալ, ինչը կնշանակի, որ որոշ խաղեր առհասարակ չեն կայանա:

Եթե Պրեմիեր-լիգայի մրցաշրջանը դադարեցվի, ամենայն հավանականությամբ տեղի կունենան բանակցություններ՝ որոշելու, թե արդյոք նախորդ արդյունքները չեղարկվո՞ւմ են, թե՞ մնում են ուժի մեջ: Եթե մրցաշրջանի մնացած հատվածի խաղերը չեղարկվեն, ապա ամեն դեպքում պետք է որոշել, թե որ ակումբներն են հանդես գալու եվրագավաթներում: Չի բացառվում, որ լիգայի ղեկավարությունն ինչ որոշում էլ կայացնի, ակումբները կարող են բողոքարկել դրանք: