Ոստիկանության ծառայողներն «Արմնյուզ» ՀԸ–ում են (տեսանյութեր)

ԵՐԵՎԱՆ, 3 ՀՈՒLԻՍԻ, Tert.am: ՀՀ Ոստիկանության ծառայողները այցելել են ArmNews հեռուստաընկերություն՝ վարչական վարույթ հարուցելու նպատակով: Այս մասին ֆեյսբուքի իր ուղիղ եթերում ասաց «Քառյակ մեդիայի» սեփականատերերից Սամվել Ֆարմանյանը:

«Բոլորին էլ պարզ է, թե որն է այն համատեքստը, ինչի համար այսօր Ոստիկանության ներկայացուցիչները վարչական տույժ են կիրառելու ArmNews-ի նկատմամբ: Մենք գործ ունենք լրատվամիջոցների ազատ խոսքին խոչնդոտելու անհիմն փորձի հետ: Լրատվամիջոցների ազատությունը չի կարող զոհ դառնալ որևէ կառավարության կամ ոստիկանության քմահաճույքներին»,- ասաց Ֆարմանյանը:

Սամվել Ֆարմանյանն ասաց, որ սա իրենք դիտարկում են որպես Armnews հեռուստաընկերության և լրատվամիջոցների ազատությանն ուղղված ձեռնոց, որը ստանալու է համարժեք պատասխան. «Սա չի անցնելու, Նիկոլ Փաշինյան չէ, ուզում է 40 Նիկոլ Փաշինյան լինի: Սա հազարավոր մարդկանց տասնամյակների ձեռքբերումն է, սա մի ազատություն է, առանց որի մենք արդյունավետ և զարգացող պետություն չենք կարող ստեղծել, և եթե Արմնյուզի եթերը որևէ Նիկոլ Փաշինյանի կամ որևէ մի ոստիկանության դուրը չի գալիս, ուրեմն պատճառները պետք է փնտրել ոչ թե դիմակի բովանդակության, դրա առկայության ու բացակայության մեջ, այլ պետք է լրիվ այլ տեղ փնտրել»:

Ֆարմանյանի խոսքով՝ վարչական վարույթ հարուցելու պատճառաբանությունն այն է, որ ArmNews հեռուստաընկերության հեռուստամեկնաբանը տաղավարում դիմակ չի կրել: Նա շեշտեց, որ չկա որևէ իրավական հիմք, որով հաղորդավարները, եթե սոցիալական հեռավորություն են պահպանում, ապա այդ դեպքում ևս պարտավոր են դիմակ կրել: Նրա խոսքով՝ ոստիկանները նպատակ ունեն տաղավարը ուսումնասիրելու, որպեսզի հասկանան, արդյոք թույլատրելի է հաղորդավարներին առանց դիմակ հաղորդում վարելը:

Մանրամասները՝ տեսանյութում: